Raketa gjigante Starship e SpaceX ka shpërthyer edhe një herë, këtë herë mbi Oqeanin Indian, duke i dhënë një tjetër goditje projektit ambicioz të Elon Musk për të kolonizuar Marsin. Ky ishte një tjetër test i nivelit të lartë për sistemin më të madh dhe më të fuqishëm të fluturimit hapësinor të ndërtuar ndonjëherë – me një gjatësi prej 123 metrash – i cili u lëshua nga baza Starbase në Teksasin Jugor, në orën 18:36 me orën lokale.

Qëllimi i misionit ishte të testonte një seri përmirësimesh, përfshirë lëshimin e tetë simulatorëve të satelitëve Starlink dhe verifikimin e sistemit të rikthimit të pjesës së sipërme të raketës, duke hequr qëllimisht 100 pllaka mbrojtëse të nxehtësisë për të testuar qëndrueshmërinë. Ndonëse faza e lëshimit dhe ngjitjes u zhvillua sipas parashikimeve, motori i fuqishëm Super Heavy pësoi një dështim katastrofik gjatë ndezjes së motorëve për ulje në det.

SpaceX konfirmoi humbjen e përforcuesit (booster), por theksoi se kjo ishte brenda parashikimeve për shkak të kushteve ekstreme të testimit. Ndërkohë, pjesa e sipërme e Starship-it arriti me sukses në orbitën e planifikuar suborbitale falë funksionimit të gjashtë motorëve të saj.

Megjithatë, pak minuta më vonë, një derë anësore në pjesën e sipërme të raketës dështoi të hapej, duke bërë të pamundur nxjerrjen e simulatorëve të satelitëve. Administrata Federale e Aviacionit në SHBA (FAA) është vënë në dijeni për “anomalinë” dhe ka nisur hetimet për të vlerësuar ndikimet që mund të ketë ky dështim në misionet e ardhshme.

Në një deklaratë, FAA tha: “Nuk ka raportime për dëmtime te publiku apo pronat publike për momentin. Jemi duke punuar ngushtë me SpaceX për të analizuar incidentin.”

Vetë Elon Musk, pavarësisht dështimit, theksoi përparimet e arritura krahasuar me testet e mëparshme. “Starship arriti të ndalte motorët sipas planit, që është përmirësim i madh nga fluturimi i fundit. Gjithashtu, nuk pati humbje domethënëse të pllakave mbrojtëse gjatë ngjitjes,” shkroi ai në rrjetin social X.

Kjo ishte hera e parë që një përforcues Super Heavy ripërdorej – i njëjti që ishte përdorur edhe në janar. Për këtë mision, inxhinierët e SpaceX qëllimisht kishin çaktivizuar një nga motorët qendrorë për të testuar sjelljen e sistemit në kushte jonormale. Megjithatë, raketa nuk u rikuperua, pasi fokusimi kryesor ishte mbledhja e të dhënave gjatë zbritjes së pjerrët në atmosferë.

Pavarësisht objektivave të paplotësuar dhe një tjetër pengese në misionin e Musk për ta bërë jetën ndërplanetare, SpaceX e quajti testin “të suksesshëm në aspektin e të mësuarit”. “Me një test të tillë, suksesi vjen nga ajo që mësojmë. Kjo përvojë do të ndihmojë në rritjen e besueshmërisë së Starship-it,” tha kompania në një deklaratë.

Musk premtoi gjithashtu ritëm më të shpejtë lëshimesh në muajt në vijim: “Do të kemi nga një fluturim çdo 3–4 javë.”

Starship ka kaluar tashmë nëpër një seri testesh të pasuksesshme. Në prill, një tjetër fluturim u anulua në momentet e fundit. Megjithatë, filozofia e SpaceX ka mbetur e pandryshuar: “dështim i shpejtë, mësim i shpejtë.”

FAA ka miratuar kohët e fundit rritjen e numrit të lejeve për lëshime Starship-i, nga 5 në 25 në vit. Kjo pavarësisht kundërshtimeve nga grupet ambientaliste që shprehën shqetësim për ndikimin tek breshkat detare dhe zogjtë e vijës bregdetare.

Për momentin, nuk është caktuar ende një datë për testin e ardhshëm. Por pavarësisht pengesave teknike, SpaceX mbetet e përkushtuar ndaj zhvillimit të një rakete që mund të përdoret në mënyrë të plotë, të shpejtë dhe të ripërdorshme për udhëtime ndërplanetare.