Kjo është nëna e re që përfundoi në një takim makthi me një trajner fitnesi, i cili përfundoi me ndjekje policore dhe një përplasje prej 250,000 paund që la shtatë efektivë policie të shtruar në spital.
Courtney Redfern, 27 vjeçe, nënë e dy fëmijëve, ishte në takimin e saj të parë me Mayzar Azarbonyad, 20 vjeç, kur policia u përpoq të ndalonte BMW-në e fuqishme të këtij të fundit, teksa e shoqëronte në shtëpi.
Pavarësisht kundërshtimeve të Courtney-t, Azarbonyad – me origjinë iraniane – shtypi gazin dhe nisi një ndjekje të rrezikshme në autostradë në drejtim të Newcastle.
I ndjekur nga helikopteri i policisë, katër makina policie u përfshinë në një manovër taktike për ta rrethuar makinën. Por vetëm pak sekonda më vonë, një makinë tjetër policie e paidentifikuar u përplas me shpejtësi 130 km/h me grupin e makinave të ndaluara, duke krijuar një skenë që dëshmitarët e përshkruan si “kasaphanë”.
Në mes të gjithë këtij kaosi ishte edhe Courtney, e cila si për mrekulli, nuk pësoi lëndime të rënda.
Një burim tha: “Ishte një traumë e madhe për Courtney-n dhe familjen e saj. Ishte vetëm një takim i parë dhe askush nuk do ta kishte imagjinuar një përfundim të tillë për një mbrëmje të zakonshme.”
Ajo u arrestua së bashku me Azarbonyad nën dyshimin për ndihmë dhe bashkëpunim në drejtim të rrezikshëm, por më vonë u la e lirë, edhe pse vijon të hetohet për posedim të mundshëm kanabisi në momentin e aksidentit.
Courtney, që më parë ka menaxhuar një pub në zonën e Gateshead, nuk besohet të ketë vazhduar kontaktet me Azarbonyad pas ngjarjes.
Në një seancë gjyqësore në Newcastle, Azarbonyad – i cili qeshi nervozisht kur u pyet nëse ishte ende në kontakt me Courtney – duhej të dënohej për aksidentin, por seanca u shty për të shqyrtuar një dënim të mëparshëm që ai e kontestoi.
Gjykata u informua se ai kishte marrë tetë pikë ndëshkimi për drejtim pa patentë dhe siguracion më 16 shtator 2023, por ai pretendoi se nuk kishte dijeni për këtë.
Avokatja e tij tha se ishte e mundur që dikush tjetër të ketë përdorur identitetin e tij.
Gjykatësi e la të lirë me kusht që të mos ngasë asnjë automjet dhe i vendosi një orar ndalimi nga ora 22:00 deri në 08:00.
Aksidenti, që ndodhi në orën 2:30 të mëngjesit në autostradën A1, bllokoi trafikun për më shumë se 12 orë. Pamjet tregonin një makinë të kthyer përmbys dhe pjesë të shpërndara në të tre korsitë. Një automjet policie kishte mbetur pa çati dhe me dyert e shqyera.
Shtatë oficerë policie u dërguan në spital, por fatmirësisht pa lëndime kërcënuese për jetën. Ndërkohë që dy personat në BMW nuk pësuan lëndime.
Azarbonyad u përpoq të shmangte ndalimin në fshatin Swalwell pasi një nga dritat e pasme të makinës nuk funksiononte. Ai u pa më pas në afërsi të autostradës A1 dhe u ndoq deri në përplasjen pranë rrethrrotullimit Denton – i njëjti vend ku në vitin 2010 Raoul Moat qëlloi dhe verboi një polic.
Kur u mor në pyetje, Azarbonyad e përshkroi ngasjen e tij si “e ndyrë”. Por vetëm dy ditë pas aksidentit, ai u kap sërish duke ngasur një makinë tjetër, një Hyundai i kuq, për të shkuar në punë në një palestër në Newcastle – pavarësisht ndalimit të përkohshëm dhe mungesës së patentës.
Prokurori në gjykatën e magjistraturës tha: “Kushdo që ka sens të përbashkët do të kishte ndaluar së drejtuari pas një incidenti kaq serioz që ishte kudo në lajme. Por jo, ai vazhdoi si të mos kishte ndodhur gjë.”
Avokati i tij e përshkroi Azarbonyad si trajner personal, që nuk merr ndihmë ekonomike dhe nuk ka precedentë të mëparshëm penalë. Ai u shpreh se klienti i tij kishte panikuar në momentin e përballjes me policinë dhe e pranoi se kishte qenë i papërgjegjshëm që ishte kthyer sërish në timon.
Avokati shtoi se në momentin e përplasjes, ai kishte vendosur sinjalin e kthimit dhe kishte shenjëstruar me dorë se po frenonte – ndërsa ishte pothuajse ndalur.
Por më pas, një makinë tjetër policie që lëvizte me 135 km/h, u përplas me ta me rreth 80 km/h, duke shkaktuar një efekt zinxhir që përfshiu edhe automjete të tjera të policisë.
Shërbimi i Ambulancës së Veriut të Anglisë deklaroi: “Në orën 2:29 të mëngjesit më 9 prill morëm një thirrje për një aksident rrugor në A1 në afërsi të Newcastle. Dërguam pesë ambulanca, një paramedik specialist, një oficer detyre dhe dy njësi të ndihmës emergjente. Pesë pacientë u dërguan në spital për trajtim të mëtejshëm.”
