Pas më shumë se dy vitesh larg ekranit, Arbana Osmani është gati për një rikthim që pritet të trazojë sezonin televiziv të vjeshtës. Moderatorja e njohur shqiptare është në bisedime të avancuara për t’u rikthyer në ekran, dhe këtë herë jo në platformën ku ndërtoi një pjesë të rëndësishme të karrierës, por në Tv Klan, që duket se do të jetë shtëpia e saj e re profesionale.

Burime për “Lajme Webi” bëjnë me dije se një takim i zhvilluar javën e kaluar ka vendosur themelet për një marrëveshje të re, e cila pritet të finalizohet së shpejti. Megjithëse detajet zyrtare nuk janë bërë publike, sinjalet janë pozitive dhe gjithçka tregon se Arbana i ka thënë “Po” një oferte të majme për të moderuar një program të ri, ndoshta me histori reale dhe emocione të forta, një terren që ajo e njeh mirë.

Por rikthimi i saj është më shumë se një kthim në ekran. Në skenën e “X Factor Albania”, vetëm pak javë më parë, Arbana ndau një rrëfim emocional që hodhi dritë mbi arsyet e largimit të saj nga një nga programet më të ndjekura në Shqipëri – “Big Brother”. Ajo e përshkroi largimin si një vendim të vështirë, por të domosdoshëm për të mos humbur veten në rrugën drejt suksesit dhe ambicies.

Moderatorja pranoi se nuk kishte plan B, por e ndiente se duhej të ndalonte. U përball me frikën, dyshimet dhe një heshtje të madhe profesionale – për të rikuperuar kohën me fëmijët dhe për të shijuar jetën reale larg followersave dhe grimit.

“Duke ikur nga suksesi në sytë e publikut, po njihja një sukses të ri – ai i jetës sime të vërtetë. Audiencat e mëdha u zëvendësuan me duartrokitjet e fëmijëve të mi,” – u shpreh ajo me emocion.

Rikthimi i Arbanës në televizion nuk është vetëm një hap profesional, por një deklaratë publike mbi rëndësinë e autenticitetit, guximit dhe zgjedhjes për të jetuar një jetë në përputhje me vlerat personale.

Në pritje të konfirmimit zyrtar të projektit që do të drejtojë, një gjë është e sigurt: Arbana Osmani po kthehet më e fortë dhe më e bindur se kurrë për të mos humbur “dritën e saj”.