Një sondazh i ri nga Britania zbulon një prirje befasuese: gati gjysma e të rinjve do të preferonin të jetonin në një botë pa internet. Tendenca reflektohet edhe në lëvizje si “The Offline Club”, një komunitet me mbi 530 mijë ndjekës në Instagram, që megjithatë promovon shkëputjen nga rrjetet sociale.

Ironia e një klubi “offline” në Instagram

Themeluar nga tre të rinj holandezë, Jordy, Ilya dhe Valentijn, The Offline Club synon të “rikthejë njerëzoren në një shoqëri të izoluar dhe të fiksuar pas ekranit”. Ata organizojnë takime ku ndalohen telefonat, laptopët dhe çdo pajisje digjitale. Pjesëmarrësit lexojnë, luajnë, pushojnë ose thjesht bisedojnë – një kthim tek thjeshtësia e dikurshme.

“Je gati të heqësh dorë nga telefoni?”, pyetet në një nga videot promovuese të klubit. Përgjigjja duket gjithnjë e më shpesh: “Po!”

Takime pa telefona në gjithë Europën

Pas Amsterdamit, lëvizja është përhapur në Londër, Paris, Milano, Kopenhagë dhe edhe në Gjermani, ku janë shfaqur të parat restorante dhe ambiente publike që kërkojnë lënien e telefonit në shtëpi.

Kjo prirje reflekton një realitet të ri: sipas të dhënave të Bitkom në fund të vitit 2024, të rinjtë nga 16 deri në 29 vjeç kalojnë mesatarisht më shumë se tre orë në ditë me smartphone – më shumë se çdo grupmoshë tjetër.

70% e të rinjve ndihen keq pas rrjeteve sociale

Një sondazh i organizatës britanike British Standards Institution (BSI) zbulon se 70% e 16–21 vjeçarëve ndihen më keq kur kalojnë shumë kohë në rrjetet sociale. Më shumë se gjysma kërkojnë një “bllokim digjital” pas orës 22:00, ndërsa 46% thonë se do preferonin të ishin të rinj në një botë pa internet.

Studimi bazohet në një kampion prej 1,293 të rinjsh dhe përputhet me rezultate të tjera, përfshirë një anketë të Harris Polls, ku shumë të rinj u shprehën se do të kishin dashur që TikTok, Instagram apo X të mos ekzistonin fare.

Politikat reaguese: rritje moshe dhe ndalim në shkolla

Disa qeveri po përpiqen të reagojnë:

• Norvegjia planifikon të rrisë moshën minimale për rrjetet sociale nga 13 në 15 vjeç.
• Australia e ka çuar këtë moshë në 16 vjeç, më e larta në botë.
• Danimarka po ndalon përdorimin e tabletëve dhe smartphone-ve në shkolla.
• Britania po shqyrton ndalime të detyrueshme në orare të caktuara.

Shëndeti mendor: një alarm në rritje

Ekspertët lidhin përdorimin e tepruar të smartphone-ve me:

• depresion,
• ankth,
• çrregullime gjumi,
• dhe varësi.

Një studim i revistës BMC Medicine zbuloi se simptomat psiko-emocionale ranë me 27% kur u kufizua përdorimi i telefonit. Organizata OECD paralajmëron se shëndeti mendor i të rinjve është përkeqësuar ndjeshëm në 15 vitet e fundit – një tendencë e përforcuar edhe nga pandemia dhe ekspozimi ndaj rrjeteve sociale.