Një familje që kishte marrë pjesë në programin “DIY SOS” tha se pas 5 vjetësh ende po përballet me shpenzime për riparimet e punimeve të këqija të ndërtimit që iu ishin bërë në shtëpinë e tyre gjatë emisionit.
Peter Chapman kishte kërkuar nga ekipi i Nick Knowles të bënte shtëpinë dhe oborrin më të aksesueshëm për gruan e tij, Sarah, e cila vuan nga distrofia miotonike.
Por, puna e ekipit televiziv rezultoi shumë e keqe dhe Chapmanët kanë shpenzuar në pesë vitet e fundit mbi 40,000 paund për të korrigjuar gabimet dhe dëmet që i shkaktuan.
BBC, që transmetoi programin në vitin 2020, fillimisht i ofroi familjes një kompensim prej 15,000 paund, por pasi Chapmanët refuzuan, nuk dëgjuan më asgjë nga korporata, pavarësisht se kanë dërguar mbi 50 emaile dhe kanë bërë shumë telefonata.
Peter Chapman, 66 vjeç, kujdestari i plotë i gruas së tij 61-vjeçare, tha:
“Isha duke menduar se do të merrnim pjesë në një reality show për rinovimin e shtëpisë, por u kthye në një shfaqje tmerri. Nick Knowles shkatërroi shtëpinë tonë të bukur dhe as ai, as BBC nuk kanë pasur kurajon të më kontaktojnë me një falje apo ofertë të arsyeshme për dëmet që shkaktuan.”
Puna e dobët përfshinte gabime si një rampë shumë e pjerrët që nuk i mundëson Sarah-t të futet në oborr, një dysheme prej druri sintetike tepër rrëshqitëse, duke e bërë që ajo të binte shpesh, dhe dëmtime të çatisë që shkaktuan përmbytje në shtëpi.
Peter Chapman ka kryer shumë riparime vetë, por disa nga riparimet më të mëdha si zëvendësimi i oborrit dhe riparimi i çatisë janë bërë nga kompani të specializuara me kosto të konsiderueshme.
Ai tha se këto punë i marrin shumë kohë dhe përkujdesje për shkak të detajeve të shumta që zbulojnë gabimet vetëm kur është shumë vonë dhe kostot janë të mëdha.
Familja nuk është në gjendje financiare për të angazhuar një avokat për t’i paditur BBC-në për dëmet.
Peter tha:
“Kam hequr dorë nga shpresa për të marrë mbrapsht paratë që kam shpenzuar në riparime. Çmimet po rriten dhe vetëm javën e kaluar harxhuam 2,000 paund për materiale ndërtimi. Megjithatë, jam i sigurt që një ditë do të arrijmë të jetojmë në një shtëpi të bukur dhe funksionale – por jo falë BBC-së apo Nick Knowles.”
Një zëdhënës i BBC-së u shpreh:
“DIY SOS është një program që bashkon komunitetet dhe ndihmon përmirësimin e jetës së atyre në nevojë, falë qindra vullnetarëve që japin kohën e tyre për t’u angazhuar. Si në të gjitha projektet tona të mëparshme, ndërtimi në Charlton Kings u planifikua dhe u realizua në përputhje me të gjitha rregulloret dhe u miratua nga inspektorët e ndërtimit në terren.”
