Në një ndërhyrje kirurgjikale që zgjati plot 15 orë dhe përfshiu gati 60 mjekë e profesionistë të shëndetit, motrat binjake Kiraz dhe Aruna nga Brazili janë ndarë me sukses. Të lindura të bashkuara në kraharor, bark dhe legen, vajzat njëvjeçare iu nënshtruan një prej operacioneve më të ndërlikuara ndonjëherë të kryera në shtetin brazilian të Goiás.

Binjaket ishin të njohura mjekësisht si tripus ischiopagus, një formë tepër e rrallë e ngjitjes ku fëmijët ndajnë legenin dhe kanë tre këmbë të përbashkëta – një gjendje që përbën vetëm 6 për qind të rasteve të binjakëve të ngjitur në mbarë botën.

Operacioni u zhvillua më 10 maj dhe u krye nga një ekip prej 16 kirurgësh që punuan me turne katërorësh për të minimizuar rreziqet. Ndërhyrja paraprihej nga muaj përgatitjeje intensive, përfshirë vendosjen e implantëve të veçantë për zgjerimin e lëkurës që do ndihmojnë në rindërtimin e indeve dhe organeve në fazat e ardhshme.

Kiraz dhe Aruna aktualisht ndodhen në kujdesin intensiv të një spitali pediatrik dhe janë në gjendje të qëndrueshme. Megjithëse ndarja ka qenë e suksesshme, ato do të kenë nevojë për operacione të tjera për të përfunduar rikonstruktimin e trupit pas ndarjes.

Operacioni, me një kosto prej 310 mijë paundësh, u cilësua nga kirurgu drejtues Dr. Zacharias Calil si “një ndër procedurat më të ndërlikuara që kemi realizuar ndonjëherë”. Ai theksoi se ndarja e binjakëve të ngjitur mbetet një ndër sfidat më delikate të mjekësisë moderne, ku çdo detaj është çështje jete a vdekje.

Ky rast rrallë i binjakëve që ndajnë organe vitale sjell vëmendje ndërkombëtare ndaj mrekullive të mjekësisë bashkëkohore dhe sfidave të saj etike e teknike.