Edhe pse në Vorë është numëruar vetëm një kuti votimi, Partia Socialiste ka nisur festën sikur fitorja të ishte zyrtare. Pamjet që po qarkullojnë në rrjet tregojnë mbështetës të PS-së duke kërcyer me daulle, hedhur valle dhe duke ndezur fishekzjarrë përpara selisë së tyre në qytet, ndërkohë që procesi i numërimit është ende në fazën fillestare.

Në video shihen grupe simpatizantësh që festojnë me muzikë popullore dhe atmosferë triumfi, megjithëse Komisioni Qendror i Zgjedhjeve nuk ka shpallur ende asnjë rezultat zyrtar për bashkinë. E vetmja kuti e hapur deri tani ka treguar një avantazh për PS-në, por festa e organizuar sugjeron se rezultati duket i paracaktuar për ta — të paktën në sytë e organizatorëve.

Ky entuziazëm i parakohshëm ka ngjallur reagime në rrjetet sociale, ku shumë qytetarë kanë ironizuar faktin që PS feston përpara se të ketë mbaruar procesi i numërimit, ndërsa të tjerë e shohin si një sinjal të presionit psikologjik që po tentohet të ushtrohet mbi kundërshtarët.