Nigel Farage ka shpërthyer në skenën politike me një fjalim të gjatë e të zjarrtë, duke shpallur se Reform UK është forca e re politike që do të përmbysë status quonë e dominuar prej dekadash nga Partia Laburiste dhe ajo Konservatore. Duke e quajtur fitoren e fundit në zgjedhjet lokale si “një tërmet politik”, Farage theksoi se ndryshimi ka nisur dhe është i pandalshëm.
Slogani “Britain is broken. Reform will fix it” u bë jo vetëm një mesazh mobilizues, por edhe një shprehje e zhgënjimit të akumuluar nga qytetarët britanikë, të cilët sipas Farage kanë përjetuar 15 vite keqqeverisje – fillimisht nën Konservatorët dhe më pas nën Laburistët.
Farage përshkroi një tablo të zymtë për Britaninë e sotme:
- Sistemi shëndetësor në kolaps, me 7.4 milionë njerëz në lista pritjeje;
- Krimi në rritje, ndërsa të burgosurit lirohen para kohe;
- Emigracioni jashtë kontrollit, me kufij të hapur dhe sistem azili të dështuar;
- Rrënimi i infrastrukturës, taksa të larta dhe çmime të energjisë ndër më të shtrenjtat në botë;
- Humbje e identitetit kombëtar, për shkak të çfarë ai e quan “agjendë globaliste dhe kulturë wok”.
Duke u angazhuar për një qasje të re në qeverisje, Farage paraqiti një program të gjerë me reforma rrënjësore:
- Heqja e taksës për trashëgiminë për pasuri deri në 2 milion paund dhe rritja e pragut të taksimit në 20,000 paund;
- Mbështetje për punëtorët, fermerët dhe pensionistët, duke akuzuar Laburistët për sulme të padrejta ndaj këtyre grupeve;
- Ristrukturimi i NHS-së, jo përmes fondeve të reja por përmes heqjes së burokracisë;
- Dalja nga Konventa Europiane për të Drejtat e Njeriut dhe ndalimi i imigracionit ilegal;
- Rimëkëmbja e industrisë së energjisë tradicionale dhe anulimi i objektivave të “Net Zero”;
- Investime në teknologji dhe AI, për ta kthyer Britaninë në një fuqi globale shkencore;
- Heqja e Aktit të Barazisë të vitit 2010 dhe ndalimi i politikave të “diversitetit me kuota”.
Në qendër të filozofisë së tij politike, Farage vendos tri vlera: familjen, komunitetin dhe vendin. Ai premton se nuk do të ndajë njerëzit sipas racës, fesë apo orientimit seksual, por do të ndërtojë një meritokraci të bazuar në kontributin individual.
Në fund të fjalimit të tij, ai e lidhi fushatën me trashëgiminë historike britanike dhe personalisht me përvojën e tij si gjysh për herë të parë:
“Po mendoj për Britaninë që do t’i lëmë nipërve tanë. Koha për ndryshim ka ardhur.”
Duke theksuar se fitorja në referendumin e Brexit-it e bëri të besojë te fuqia e votës, Farage deklaroi se synimi i tij tani është zyra e kryeministrit dhe se çdo qytetar që do ndryshim real “nuk duhet të shpresojë më tek të vjetrit, por të votojë për Reformën”.
