Në një video të shpërndarë në TikTok, Madonna ka habitur fansat jo vetëm me lëvizjet e saj të vallëzimit përkrah të dashurit 29-vjeçar Akeem Morris, por edhe me një pajisje të rrallë mjekësore në sfondin e banjës së saj në vilën 40 milionë dollarëshe në Upper East Side, Nju Jork.
Bëhet fjalë për ATP38 nga Swiss Bio Inov, një pajisje që përdor terapi me dritë të nivelit të ulët (photobiomodulation) për të stimuluar qelizat, përmirësuar shërimin dhe lehtësuar dhimbjen. Çmimi i kësaj makinerie arrin deri në 23,000 dollarë dhe përdoret kryesisht nga profesionistë të specializuar në fizioterapi, stomatologji, dermatologji dhe mjekësi të përgjithshme.
Ndonëse nuk është sqaruar përdorimi i saktë i saj nga Madonna, fansat dyshojnë se ajo mund ta përdorë për të trajtuar pasojat e operacionit të saj në ije në vitin 2020, si dhe për rigjenerim të lëkurës apo tonifikim estetik.
Videoja, e realizuar disa muaj më parë, përfundon me Madonna duke bërë lëvizje sensuale përballë partnerit të saj shumë më të ri në moshë, ndërkohë që në rrjet po qarkullojnë edhe imazhe nga brendësia e shtëpisë së saj – të zbuluara nga influencuesi francez Lyas, i cili përshkroi vilën si “një faltore stili dhe historie personale”.
Brenda rezidencës 26-dhomëshe, Lyas zbuloi objekte të çmuara si dy çmimet Golden Globe, trofeun e Rock and Roll Hall of Fame, foto me Barack Obamën dhe art origjinal nga ish-partneri Jean-Michel Basquiat dhe miku i saj i ndjerë Keith Haring.
Krahas nostalgjisë për të kaluarën, Madonna ka konfirmuar se po punon me Stuart Price për një vazhdim të albumit “Confessions on a Dance Floor” (2005) dhe do të rindërtojë albumin “Bedtime Stories” (1994), që përfshin hitet Secret dhe Take a Bow.
Në moshën 66-vjeçare, ajo vazhdon të thyejë kufijtë si artistja më e suksesshme solo në historinë e Billboard Hot 100 dhe të qëndrojë në qendër të vëmendjes — tashmë jo vetëm për muzikën, por edhe për teknologjinë që përdor në banjë.
