Meta, kompania e teknologjisë e drejtuar nga Mark Zuckerberg, ka nisur të rekrutojë ish-zyrtarë të Pentagonit dhe ekspertë të sigurisë kombëtare, në përpjekje për të shitur teknologjitë e saj të inteligjencës artificiale dhe realitetit virtual qeverisë amerikane. Sipas Forbes, këto lëvizje vijnë në një moment kur kompania ka hapur përdorimin e modelit të saj të AI “Llama” edhe për ushtrinë.
Rekrutimet e reja përfshijnë role si menaxherë të politikave publike me përqendrim në Shtëpinë e Bardhë dhe agjenci të sigurisë, me kërkesë të veçantë për personel me eksperiencë në Pentagon dhe akses në informacion të klasifikuar. Qëllimi i Meta është i qartë: të përforcojë praninë e saj në tregun miliardë-dollarësh të kontratave qeveritare, i cili është gjithnjë e më i orientuar drejt teknologjive të avancuara të inteligjencës artificiale dhe trajnimit nëpërmjet realitetit virtual.
Nga Facebook në frontin ushtarak
Ndërsa Meta ka qenë tradicionalisht një gjigant i reklamimit digjital, drejtimi i ri tregon një ambicie të qartë për të hyrë fuqishëm në industrinë e mbrojtjes. Në janar, kompania punësoi Francis Brennan, një ish-këshilltar të Donald Trump, për të drejtuar komunikimin strategjik nga Uashingtoni. Një tjetër punonjës i ri, me mbi një dekadë përvojë në një agjenci federale të paidentifikuar, postoi në LinkedIn se do të fokusohej në “shkëmbimin e inteligjencës” mes Meta dhe qeverisë amerikane.
Këto hapa ndodhin ndërsa Zuckerberg vetë ka ndërmarrë një “ofensivë sharmi” për të përmirësuar marrëdhëniet me administratën Trump. Pas një donacioni prej 1 milion dollarësh për ceremoninë e inaugurimit të Trump, Meta hoqi programin e verifikimit të fakteve në Facebook — një vendim i përshëndetur nga të djathtët. Po ashtu, Zuckerberg ka shuar ekipin për diversitet, ka emëruar aleatin e Trump dhe drejtuesin e UFC-së, Dana White, në bordin e Meta-s dhe ka promovuar lart lobistin republikan Joel Kaplan si shef të çështjeve globale.
Meta ndjek gjurmët e Google, OpenAI dhe Palantir
Meta nuk është e vetme në këtë garë për kontrata ushtarake. OpenAI, Google, Anthropic dhe Palantir kanë ndryshuar qasjet e tyre për të lejuar përdorimin ushtarak të teknologjisë AI. Pasi fillimisht kishin hezituar për arsye etike, këto kompani kanë rikthyer interesin për sektorin e mbrojtjes, ku fondet janë të qëndrueshme dhe të mëdha.
Meta është aktualisht duke bashkëpunuar me kompani të mëdha të mbrojtjes si Leidos, Lockheed Martin, Booz Allen dhe Palantir, për të integruar modelin Llama në përdorime ushtarake, përfshirë edhe zëvendësimin e dokumenteve të shkruara në Stacionin Ndërkombëtar të Hapësirës. Në një deklaratë të fundit, kompania theksoi se “është në interes të Amerikës dhe të botës demokratike që modelet amerikane me burim të hapur të jenë më të avancuara sesa ato të Kinës.”
VR për stërvitje luftarake, AI për analizë inteligjente
Përveç AI, Meta po promovon edhe teknologjinë e saj të realitetit virtual si mjet për trajnime ushtarake. Që nga viti 2019, Pentagoni ka shqyrtuar përdorimin e VR për përgatitjen e trupave, dhe tani Meta synon të zë vendin e saj në këtë fushë. Një nga pozicionet e hapura kërkon një ekspert me përvojë të thellë në kontraktime federale për të krijuar “partneritete të reja me qeverinë amerikane.”
Megjithëse nuk ka njoftime zyrtare për kontrata të mëdha me Pentagonin, analistët thonë se Meta po përgatitet për të qenë lojtare kryesore në atë që mund të bëhet tregu më i madh i AI në botë — sektorin ushtarak amerikan.
Nga rrjet social në rrjet ushtarak?
Shana Marshall nga Universiteti George Washington e përmblodhi qartë: “Nëse kërkon një burim parash që nuk do të mbyllet kurrë, shko tek Pentagoni.” Dhe mesa duket, Mark Zuckerberg e ka marrë seriozisht këtë këshillë.
