Që prej 15 marsit, Shtetet e Bashkuara kanë intensifikuar fushatën ajrore ndaj rebelëve jemenas Huthi – të mbështetur nga Irani – duke goditur mbi 1.000 caqe. Objektivi: ndalja e sulmeve ndaj anijeve në Detin e Kuq dhe rritja e presionit mbi Teheranin, teksa rifillojnë negociatat bërthamore.
Por, ndonëse Komanda Qendrore amerikane pretendon se ka ulur me 69% lëshimet e raketave dhe 55% të sulmeve me dronë, analistët janë skeptikë. “Huthit janë të vendosur dhe kanë kthyer fushatën në avantazh propagandistik”, tha Colin Clarke nga Grupi Soufan.
Jeremy Binnie, ekspert i mbrojtjes në Lindjen e Mesme, thekson se rebelët jo vetëm që vazhdojnë sulmet ndaj Izraelit, por po arrijnë të godasin edhe objektiva amerikane, përfshirë rrëzimin e dronëve MQ-9 dhe incidentin me avionin F/A-18.
Në aspektin diplomatik, përpjekjet për t’i izoluar Huthit mund të kenë pasur efekt të kundërt: aleanca e tyre me Iranin është thelluar. SHBA shpreson se sulmet do të detyrojnë Teheranin të lëshojë pe në bisedimet bërthamore, por vetë negociatat janë shtyrë pa afat të ri.
Mes një fushate ajrore intensive dhe mungesës së rezultateve afatgjata, SHBA rrezikon jo vetëm të dështojë në ndalimin e rebelëve Huthi, por edhe të përforcojë “boshin e rezistencës” të udhëhequr nga Irani.
