Një avion pasagjerësh i kompanisë Ryanair u detyrua të anulojë uljen vetëm pak çaste pasi preku pistën në Aeroportin e Tenerife South, për shkak të kushteve të rënda atmosferike. Video të regjistruara nga kulla e kontrollit tregojnë avionin duke u lëkundur nga njëra anë në tjetrën gjatë përpjekjes për të ulur në mes të një stuhie të enjten e kaluar.

Sipas kontrollorëve të trafikut ajror, avioni përjetoi një “glitch” të shkaktuar nga fenomeni meteorologjik i njohur si “wind shear” – një ndryshim i papritur i drejtimit dhe shpejtësisë së erës që e bëri të pasigurt uljen. Piloti zbatoi menjëherë manovrën e “go-around”, duke fluturuar sërish për të shmangur uljen.

Agjencia Meteorologjike Shtetërore e Spanjës (AEMET) njoftoi se kushtet e motit shkaktuan probleme në të gjitha aeroportet e Ishujve Kanarie, përfshirë Tenerife South dhe Gran Canaria. Sipas raportimeve, gjatë ditës u regjistruan disa tentativa të dështuara për ulje për shkak të erërave të pasme dhe turbullirave të fuqishme të ajrit.

Kontrollorët spanjollë shpjeguan në rrjetin X (ish-Twitter) se ekuipazhet në raste të tilla njoftojnë për manovrën e go-around, dhe më pas vendosin nëse do të provojnë përsëri uljen, do të devijojnë drejt një aeroporti tjetër, apo do të presin në ajër. Në shumicën e rasteve, ulja realizohet me sukses në përpjekjen e dytë.

Fatmirësisht, nuk janë raportuar incidente apo lëndime serioze. Ryanair ende nuk ka komentuar mbi ngjarjen.