Një restorant në Britani është detyruar të paguajë 75,000 paund dëmshpërblim një familjeje nga Irlanda e Veriut, pasi i akuzoi publikisht se kishin ikur pa paguar një faturë prej 150 paundësh – një akuzë që më pas rezultoi të ishte plotësisht e pavërtetë.
Familja McGirr, me banim në County Tyrone, ishte fotografuar dhe ekspozuar në një postim në Facebook nga pub-i Horse and Jockey në Tideswell, ku menaxhmenti e përshkroi sjelljen e tyre si “tronditëse” dhe i etiketoi si “dine-and-dashers” (persona që hanë dhe largohen pa paguar). Mediat britanike pasuan me katër raportime që riprodhuan akuzat, duke përforcuar dëmin ndaj reputacionit të familjes.
Gabimi i stafit – çoi në një linçim publik
Familja kishte konsumuar dy biftekë ribeye prej 27 paundësh, dy pjata me gammon Derbyshire prej 15.25 paundësh dhe disa birra, por pagesa përmes një pajisjeje kartash nuk ishte regjistruar në arkën kryesore. Megjithatë, ata kishin paguar plotësisht faturën – një fakt që u zbulua vetëm pasi ishte bërë publike akuza.
Në gjykatën e Belfastit, avokati i familjes, Peter Girvan, deklaroi se akuzat ishin “tërësisht të rreme, serioze dhe shpifëse”, duke e krahasuar incidentin me një linçim publik pa prova. Gjykata dëgjoi se familja kishte përjetuar turpërim dhe dëme serioze në reputacion, pasi u etiketuan si hajdutë në rrjete sociale dhe në media.
Dëmshpërblimi dhe ndjesa publike
Në përfundim të procesit, pub-i pranoi se nuk kishte asnjë bazë për akuzat, kërkoi ndjesë publike dhe ra dakord të paguante 75 mijë paund si kompensim, përveç shpenzimeve ligjore të familjes. Avokati i tyre, Darragh Carney, deklaroi se klientët e tij ndihen “të rehabilituar” dhe se vendimi konfirmoi pafajësinë e tyre.
Pub-i kishte tentuar të justifikonte ngjarjen vitin e kaluar, duke e cilësuar si një “gabim i sinqertë” nga një punonjës i papërvojë, i cili kishte marrë pagesën por nuk e kishte regjistruar në sistem. Pavarësisht kësaj, stafi u pushua nga puna pas incidentit.
Ky rast nënvizon rrezikun e gjykimeve të nxituara në rrjete sociale dhe pasojat e rënda që mund të ketë një shpifje publike, edhe kur bëhet nga një subjekt biznesi.
