Ministria e Jashtme gjermane ka reaguar ashpër ndaj deklaratave të Sekretarit Amerikan të Shtetit, Marco Rubio, i cili kritikoi vendimin e Zyrës Federale për Mbrojtjen e Kushtetutës për të klasifikuar partinë AfD si një formacion të konfirmuar ekstremist të djathtë.
Rubio e quajti vendimin “tirani e maskuar si demokraci” dhe akuzoi Gjermaninë për dhënie të kompetencave shtesë shërbimeve të inteligjencës për të “mbikëqyrur opozitën”. “Nuk është AfD që është ekstremiste, por politika e imigracionit që ajo kundërshton,” shkroi Rubio në platformën X, duke kërkuar që Berlini të ndryshojë kursin.
Në një përgjigje të drejtpërdrejtë, Ministria e Jashtme gjermane theksoi se:
“Kjo është demokracia. Vendimi është rezultat i një hetimi të pavarur dhe të bazuar në sundimin e ligjit. Fjala e fundit i takon gjykatave të pavarura. Ne kemi mësuar nga historia jonë se ekstremizmi i djathtë duhet ndalur.”
Vance dhe Musk në mbështetje të AfD-së
Reagimit të Rubios iu bashkua edhe zëvendëspresidenti amerikan J.D. Vance, i cili në një postim në X e quajti AfD-në “partinë më popullore në Gjermani”, duke akuzuar burokracinë se po përpiqet ta shkatërrojë.
Ndërkohë, Elon Musk, këshilltar joformal i fushatës së Trump dhe përkrahës i së djathtës ekstreme në SHBA dhe Evropë, deklaroi se “ndalimi i AfD-së do të ishte një sulm ekstrem ndaj demokracisë”. Musk ka promovuar publikisht AfD-në para zgjedhjeve federale në Gjermani.
AfD shpallet zyrtarisht ekstremiste
Vendimi i autoriteteve gjermane për të klasifikuar Alternativën për Gjermaninë (AfD) si një parti me rrezik të sigurt ekstremist, erdhi pas hetimeve të gjata nga Zyra për Mbrojtjen e Kushtetutës në Këln. Sipas kësaj zyre, “karakteri ekstremist i partisë shpërfill dinjitetin njerëzor”, duke justifikuar mbikëqyrjen më të gjerë ligjore.
Më parë, AfD ishte vetëm një “rast nën hetim”. Tani, klasifikimi i saj si ekstremiste i jep shtetit gjerman të drejtë ligjore të përdorë metoda survejimi më të avancuara kundër saj, përfshirë përgjime dhe infiltrime.
