Sophie Carter, 40 vjeçe, nga Southsea, Hampshire, ndryshoi gjini pas arrestimit për posedim të imazheve të pahijshme të fëmijëve. Në kohën e arrestimit, Carter ishte burrë dhe njihej me emrin Dominic – dhe sipas hetuesve, u konfrontua fizikisht me policinë. Por në paraqitjen në gjykatë në gusht 2023, u shfaq e veshur me fanellë rozë, pantallona rozë dhe me manikyr rozë, duke përdorur emrin Sophie.
Carter, ish-punonjëse në sektorin e krasitjes së pemëve, u zbulua se kishte 11 fotografi të pahijshme të fëmijëve në dy telefona celularë të sekuestruar nga policia. Dy imazhe ishin të kategorisë A (më e rënda), tre të kategorisë B dhe gjashtë të kategorisë C. Në prill 2021, Carter pranoi tre akuza për krijim të materialeve të pahijshme me fëmijë dhe fillimisht u dënua me 6 muaj burg, por me kusht për 18 muaj. Gjithashtu u urdhërua të kryente 60 orë aktivitet rehabilitimi dhe 120 orë punë vullnetare.
Megjithatë, Carter u paraqit edhe katër herë të tjera në gjykatë pasi shkelte kushtet e dënimit me kusht – dhe tani është burgosur për 6 muaj. Avokatja Eve Shelley, duke mbrojtur Carter-in në Gjykatën e Lartë të Southampton-it, tha se klientja po mbahet në burgun për meshkuj HMP Winchester, gjë që po i shkakton shqetësim dhe ankth. Ajo shtoi: “Ka vështirësi shtesë për këtë të pandehur për shkak të mbajtjes në një ambient për burra – kjo po shkakton shqetësim të thellë për të.”
Në seancë, Carter u trajtua me përemrat femërorë. U dëgjua se ajo nuk kishte marrë pjesë në takimet me shërbimin e provës dhe nuk i kishte njoftuar policisë ndryshimin e adresës së banimit. Pas dënimit, Carter kishte një stil jetese kaotik, ishte bërë e pastrehë, dhe madje kishte telefonuar policinë duke pretenduar se ishte rrëmbyer, vetëm për t’u zbuluar më pas se kishte ndërruar adresë në mënyrë të paligjshme.
Prokurorja Hannah Douglas tregoi se Carter kishte kërkuar 140 paund për “shpërblim” duke dërguar mesazh për rrëmbim të rremë. Policia e gjeti dhe arrestoi pas komunikimeve të gjata gjatë ditës. Gjykata dëgjoi gjithashtu se Carter kishte shkelur urdhrat e dënimit të mëparshëm me kusht dhe nuk kishte marrë pjesë në takime të rëndësishme rehabilitimi. Carter pranoi fajësinë për të gjitha akuzat.
Avokatja e saj shtoi se Carter kishte mbetur pa strehë pasi ishte përzënë nga shtëpia e prindërve dhe madje ishte sulmuar fizikisht nga të tjerë gjatë jetës në rrugë. “Stili i jetesës i çorganizuar e bëri të humbte kontaktin me autoritetet,” – tha ajo. Megjithatë, avokatja vuri në dukje se që nga 1 prilli është në paraburgim dhe ka ndaluar përdorimin e drogave ilegale, duke e parë burgimin si mundësi për të rifilluar nga e para.
Gjyqtari Nicholas Rowland e dënoi Carter me 6 muaj burg dhe deklaroi: “Sophie Carter… nuk kam zgjidhje tjetër përveçse të jap një dënim të menjëhershëm me burg. E kuptoj që jeta juaj është kaotike. Gjëja e fundit që dua është të të dërgoj në burg, por më detyron ligji. Po të jap merita për pranimin e fajësisë dhe kam shpresë se tani, me këtë faqe të fshirë, nuk do të ketë më një tjetër. Duhet të rregullosh jetën tënde – përndryshe herët a vonë do të përfundosh në burg për periudha gjithnjë e më të gjata.”
