Blue Ivy është cilësuar si “fëmija më i madh i nepotizmit të të gjitha kohërave” pas performancës së saj gjatë turit Cowboy Carter të nënës së saj, Beyoncé, të hënën.
Vajza e talentuar 13-vjeçare doli në skenë në natën e hapjes së turit – i cili ka pasur vështirësi me shitjen e biletave – për të treguar talentin e saj duke kërcyer mbi hitin Deja Vu të Beyoncé-s.
E veshur me një kostum prej lëkure në ngjyrë vishnje, vajza gjeni kërcente plot energji në SoFi Stadium, përpara mijëra fansave.
Adoleshentja dukej kopja identike e nënës së saj ndërsa ecte vetëbesuese në skenë, duke imituar lëvizjet dhe sjelljen ikonike të Beyoncé-s.
Performanca shkaktoi reagime të forta në rrjetet sociale, ku fansat e lavdëruan Blue Ivy-n si një shembull pozitiv të nepotizmit në industrinë muzikore.
“Po qe se Blue Ivy këndon aq mirë sa kërcen, më falni, por unë do të mbështes fort atë ‘nepo baby’,” shkroi një komentues në X (ish-Twitter).
“Shumica e fëmijëve të të famshmëve nuk kanë as talent as prezencë në skenë, por Blue Ivy është yll më vete,” shtoi një tjetër.
“Jam shumë e impresionuar nga Blue Ivy. Po, është nepotizëm, por me talent,” shkroi një tjetër përdorues, ndërsa një i katërt tha: “Blue Ivy do të jetë fëmija më i suksesshëm i nepotizmit i brezit të saj, e ndjej.”
Një tjetër komentonte: “Blue Ivy, në vetëm 13 vjeç, ka fituar një çmim Grammy, ka performuar në shumicën e datave të turit Renaissance, në spektaklin e mesit të ndeshjes NFL dhe tani po bën debutimin e saj në një tjetër tur botëror me Cowboy Carter. Po dëshmon vazhdimisht se, edhe pse është ‘nepo baby’, ka talent të vërtetë.”
Kjo vjen pas momentit kur Blue i kaloi në gjatësi trupin 1.67 m të nënës së saj teksa performonin së bashku në spektaklin epik të pushimeve të fundvitit në stadiumin NRG në Houston – qyteti i lindjes së Beyoncé-s.
E veshur në stilin perëndimor të bardhë, Blue shoqëroi Beyoncé-n si balerinë rezervë gjatë pjesës kulmore të këngës Texas Hold ‘Em. Beyoncé i bëri një dedikim të fshehtë vajzës së saj gjatë këngës, duke ndryshuar fjalën “boy” me “Blue” në vargun: “Then spin me in the middle, Blue, I can’t read your mind.”
Pasi fituesja e 35 çmimeve Grammy dhe vajza e saj bënë një “two-step” dhe vallëzim në grup, ato kapën krahët për një moment të stilit “square-dance”.
Blue, e cila mban dy rekorde Guinness, është vetëm 13 vjeç, por tashmë ka fituar një çmim Grammy, një MTV VMA Moon Man, një NAACP Image Award, një Voice Arts Award, dhe dy çmime BET.
Ajo ka kërcyer më parë si balerinë rezervë për këngët My Power dhe Black Parade gjatë turit botëror Renaissance, që gjeneroi 579.8 milionë dollarë dhe zgjati 56 netë.
Adoleshentja e talentuar ka bashkëpunuar me prindërit e saj të famshëm edhe në disa këngë të tjera.
Ajo debutoi në muzikë në vitin 2012 me këngën Glory të babait të saj, Jay-Z, duke u bërë personi më i ri në histori që renditet ndonjëherë në listat e Billboard.
Në vitin 2019, Blue ishte pjesë e këngës së Beyoncé-s Brown Skin Girl, nga filmi The Lion King, e cila arriti në vendin e 76-të në Billboard Hot 100.
Vitin e kaluar, Blue bëri debutimin e saj në kinematografi duke dhënë zërin për personazhin Kiara në filmin Mufasa: The Lion King.
“Nëse do t’i tregoja vetes sime të vogël që do të isha në një film, s’do ta besoja kurrë,” tha Blue në një intervistë për Disney Studios.
“Është një përvojë e jashtëzakonshme dhe ndjej se të gjithë që janë pjesë e këtij projekti janë shumë mbështetës dhe ndihmues,” shtoi ajo.
“Jam shumë e lumtur që vajzat në të gjithë botën që duken si unë mund ta shikojnë këtë film dhe të ndihen të përfaqësuara në të.”
Beyoncé e nisi zyrtarisht turneun e saj Cowboy Carter të hënën në mbrëmje në stadiumin SoFi në Los Anxhelos.
Pas këtij koncerti hapës, superylli i popit do të performojë nëpër SHBA dhe Europë, përpara se ta mbyllë turin në Las Vegas më 26 korrik.
Megjithatë, sa i përket shitjes së biletave, Beyoncé po has vështirësi në krahasim me turnetë e saj të mëparshëm në stadiume.
