Një studim i ri zbulon se sëmundjet e zemrës tek fëmijët mund të jenë më të mundshme nëse nëna ka anemi gjatë shtatzënisë. Studiuesit e Universitetit të Oksfordit analizuan të dhënat nga 16,500 nëna si pjesë e një studimi të financuar nga Fondacioni Britanik i Zemrës.

Studimi i realizuar zbuloi se nëse një nënë ishte anemike në 100 ditët e para të shtatzënisë, gjasat për të pasur një fëmijë me sëmundje të zemrës ishin 47% më të larta se zakonisht.

Ai vlerësoi se gati një e katërta e grave shtatzëna në Mbretërinë e Bashkuar dhe më shumë se një e treta në mbarë botën kanë anemi, e cila shpesh shkaktohet nga mungesa e hekurit.

Anemia është një gjendje e zakonshme ku numri i qelizave të kuqe të gjakut ose sasia e hemoglobinës në qelizat e kuqe të gjakut është më pak se normale. Anemia e rëndë në fazat e mëvonshme të shtatzënisë mund të çojë në probleme të tilla si pesha e ulët e lindjes dhe lindja e parakohshme, zbulohet nga studimi.

Deri më tani, dihej pak për efektin e anemisë në fazat e hershme të shtatzënisë. Profesor Duncan Sparrow, i cili drejtoi studimin, tha: Ne tashmë e dimë se rreziku i sëmundjeve kongjenitale të zemrës mund të rritet nga një sërë faktorësh, por këto rezultate na ndihmojnë të kuptojmë aneminë në mënyrë specifike.

“Për shkak se mungesa e hekurit është shkaku kryesor i shumë rasteve të anemisë, suplementet e përhapura të hekurit për gratë, si kur përpiqen për një fëmijë dhe kur janë shtatzënë, mund të ndihmojnë në parandalimin e sëmundjeve kongjenitale të zemrës tek shumë të porsalindur para se të zhvillohen”, shtoi ai.

Sëmundja kongjenitale e zemrës është lloji më i zakonshëm i defektit të lindjes, i diagnostikuar mesatarisht në 13 foshnja në ditë në Mbretërinë e Bashkuar.