Ky është momenti kur dy turistë u kthyen me vonesë në port dhe panë me dëshpërim anijen e lundrimit “Rhapsody of the Seas” të largohej pa ta – ndërsa pushuesit në bord i përshëndesnin mes brohoritjesh dhe ironisë. Videoja dramatike, që është bërë virale në rrjetet sociale, tregon çiftin duke zbritur me nxitim në skelë brenda një karroce golfi, ndërsa anija niset nga porti i Saint Kitts dhe Nevis.

Sipas dëshmitarëve, stafi i anijes kishte pritur mbi 30 minuta për ta, përpara se të tërhiqej ura e ngjitjes. Në vend të një rikthimi triumfal, çifti u përball me fishkëllima dhe thirrje përshëndetëse nga pasagjerët e tjerë, të cilët festonin nisjen pa ta. Çifti, i tronditur dhe i heshtur, kthehet mbrapsht ndërsa anija largohet, duke rënë borinë në sfond. Videoja e ngjarjes është parë mbi 12 milionë herë në Instagram që nga publikimi i saj më 3 prill.