Katër muaj pas grabitjes spektakolare në vilën e saj luksoze në Londër, influencuesja dhe pasanikja nga Hong Kongu, Shafira Huang, ka folur për herë të parë publikisht, duke ndarë me ndjekësit e saj dhimbjen për humbjen jo vetëm të pasurive materiale, por edhe të kujtimeve personale e të paçmuara. Në dhjetor të vitit të kaluar, një hajdut i maskuar u fut në shtëpinë e saj në zonën elitare të Primrose Hill dhe brenda vetëm 19 minutave arriti të largohej me një “thesar” bizhuterish dhe çantash të markave luksoze, në vlerë totale 10.4 milionë paund.

Në një postim emocional në Instagram, ku ndau edhe pamjet e kamerave të sigurisë që tregojnë grabitësin duke rrëmbyer çanta Hermes dhe bizhuteri të rralla, Huang shkroi: “Ajo që më morën nuk ishte thjesht materiale. Ishin kujtime të jetës sime, të dashurive, të rritjes sime. Disa prej tyre të trashëguara nga nëna ime. Janë gjëra që nuk zëvendësohen.”

Huang dhe bashkëshorti i saj, zhvilluesi ndërkombëtar i pasurive të paluajtshme Vincent Wan, nuk ndodheshin në rezidencën e tyre 60 milionë paundëshe në momentin e grabitjes. Në shtëpi ndodheshin tetë punonjës, përfshirë guvernanten dhe shefin e personelit, Csaba Virag, i cili e përshkroi grabitësin si “Spider-Man”, për shkak të mënyrës së lëvizjes së shpejtë dhe të heshtur. Hajduti dyshohet se ka hyrë nga një dritare në katin e dytë, zakonisht e mbyllur, dhe ka shmangur për një fije takimin me një shërbyese që po dilte nga ashensori.

Lista e sendeve të vjedhura përfshin një unazë diamanti 10.73 karatësh të markës Graff, dy unaza “De Beers Butterfly”, një varëse të rrallë “Niloticus Lumiere”, disa çanta Hermes me vlerë mbi 150 mijë paund, dhe një shumë parash në dorë prej 15 mijë paundësh. Ndër sendet më personale ishte një byzylyk me emrin e Huang të gdhendur dhe një unazë “Fleur des Mers” e zbukuruar me diamante dhe safirë.

Për të nxitur informacionin nga publiku, çifti ka ofruar një shpërblim deri në 500,000 paund për çdo informacion që çon në arrestimin e autorit dhe kthimin e sendeve të grabitura. Huang ka publikuar numrin e saj personal dhe adresën e emailit në rrjete sociale për t’i dhënë rëndësi hetimit. Ajo gjithashtu ka nisur një nismë për rritjen e sigurisë lokale dhe mbështetjen e pranisë së policisë në komunitet.

Policia Metropolitane ka konfirmuar se hetimet janë ende në vazhdim dhe se çdo informacion i mundshëm mund të dërgohet në 101 ose në rrjetin social X (@MetCC), duke cituar referencën CAD 5775/07DEC24. Në një deklaratë, detektivi Paulo Roberts e cilësoi grabitjen si një akt të guximshëm, ku hajduti ka hyrë në një banesë luksoze i armatosur me një mjet të paidentifikuar, duke shkelur sigurinë dhe privatësinë e viktimave.

Megjithëse vlera monetare e grabitjes është e jashtëzakonshme, për Huang, humbja më e madhe mbetet emocionale: “Nuk janë diamante apo çanta ajo që më dhemb më shumë, por ajo që simbolizonin për jetën time. Dikush, diku, di diçka. Shpresoj që historia ime të shërbejë si paralajmërim dhe reflektim.”