Banorët e Alderley Edge u tronditën sërish nga sjellja e rrezikshme e një shoferi të ri, i cili për pak sa nuk përplasi supermakinën e tij Audi në këtë fshat piktoresk.
Pamje tronditëse tregojnë momentin kur shoferi i automjetit luksoz, me vlerë 50,000 euro , kalon me shpejtësi marramendëse mbi një rrethrrotullim në zonën e njohur si “Knightsbridge e Veriut” të shtunën.
Në video shihet se si shoferi humbet kontrollin e Audisë gri dhe shmang për pak një aksident të rëndë, duke u përplasur me trotuarin. Në dalje të rrugës, duket sikur makina do të përplaset me një barrierë, por në momentin e fundit, ajo vetëm sa e prek lehtë kangjellën metalike, duke pësuar një gërvishtje të vogël.
Për fat të mirë, nuk kishte makina të tjera pranë në momentin e incidentit, pasi Audi kalon në korsinë tjetër pas përplasjes.
Por kjo nuk e ndalon shoferin, i cili menjëherë vazhdon garën drejt Manchesterit.
Entuziasti i makinave, Scott Pattyson, regjistroi këtë moment dramatik në këtë fshat të Cheshire-it, i njohur për numrin e madh të futbollistëve të Premier League që banojnë aty.
Zona është shtëpia e disa prej supermakinave më të shtrenjta në botë, duke tërhequr pasionantë të automobilizmit dhe fotografë nga e gjithë Mbretëria e Bashkuar. Megjithatë, banorët e fshatit kanë ngritur vazhdimisht shqetësime për zhurmën e lartë dhe për turmat që bllokojnë trotuaret ndërsa bëjnë foto.
Policia është thirrur shpesh për të ndërhyrë kundër sjelljes “ekzibicioniste” të shoferëve dhe shpejtësisë së tyre të pakontrolluar, veçanërisht gjatë takimeve të organizuara të makinave.
Duke përshkruar incidentin e fundit me supermakinat, zoti Pattyson tha: “Unë isha duke qëndruar në ishullin e rrethrrotullimit duke regjistruar makina kur Audi humbi tërheqjen dhe fatkeqësisht goditi trotuarin.
“Fatmirësisht, makina pësoi vetëm dëmtime në një nga rrotat e pasme dhe shoferi doli i padëmtuar.
“Unë dhe djemtë e tjerë shkojmë shpesh në atë vend pranë Manchesterit për të parë makina. Për shkak se është një zonë e pasur, aty shohim zakonisht modele të jashtëzakonshme.”
