Në një shfaqje të bujshme ushtarake të mbajtur në Uashington, në nder të ditëlindjes së Donald Trump, kamera fokusoi jo vetëm tanket dhe trupat, por edhe gjuhën e trupit të çiftit presidencial. Sipas ekspertes së njohur të sjelljes jo-verbale, Judi James, sjellja e Melania Trump gjatë paradës sinjalizonte “tension të brendshëm” dhe një qëndrim të përmbajtur në raport me bashkëshortin.
“Dora e saj e majtë lëviz në mënyrë të përsëritur, si një ritual tensioni, ose preku flokët si për të kontrolluar veten në publik,” komentoi James. Megjithëse çifti u shfaqën dorë për dore – një moment rrallë i përzemërt – Melania mbeti më e ngurtë, thuajse duke imituar qëndrimin ushtarak të komentatorit Pete Hegseth që ndodhej pranë. Ndërsa Trump tentonte të shfaqej më “popullor” me xhaketën e hapur dhe një gjest të përmbajtur përshëndetës, Melania zgjodhi një kostum të kremtë, të qepur në mënyrë formale, që theksonte distancën mes tyre.
Ekspertja vuri në dukje gjithashtu se gjatë bisedave me Trump-in, Melania bëhej më e animuar, duke u kthyer dhe buzëqeshur gjerësisht, por jo pa shenja tensioni të nënkuptuar. Ndërkohë, Trump e kaloi pjesën më të madhe të kohës me qëndrim të përkulur dhe gjeste që përçuan një imazh jo formal, duke i kontrastuar me trupat ushtarakë në sfond.
Ceremonia, e kritikuar nga shumë si një përpjekje për të portretizuar Trump si “mbret” apo “autokrat”, u shoqërua me protesta masive nën sloganin “No Kings” dhe nuk arriti të mbushë pritshmëritë për pjesëmarrje. Sipas James, qëllimi i presidentit ishte të dallohej nga uniformat ushtarake, duke nderuar trupat pa u bërë pjesë e spektaklit vizual të disiplinës. Në kontrast të plotë, Sekretari i Shtetit, Marco Rubio, u shfaq i ftohtë dhe i mërzitur gjatë gjithë eventit, duke u ulur me fytyrë të ngrysur dhe duke psherëtirë me zë të lartë.
Pavarësisht kritikave, Trump mbylli paradën me një mesazh sfidues: “Çdo vend tjetër feston fitoret e veta. Është koha që ta bëjë edhe Amerika.” Por për shumë syresh, ishte gjuha e trupit e çiftit presidencial ajo që foli më fort se çdo fjalim.
