Një javë pasi avionët luftarakë të NATO-s u ngritën për të rrëzuar disa dronë rusë që kaluan hapësirën ajrore të Polonisë, zyrtarët amerikanë dhe perëndimorë të inteligjencës mbeten të ndarë nëse incidenti ishte i qëllimshëm apo rezultat i një devijimi teknik. Edhe pse nuk ka një konsensus të qartë, të gjithë bien dakord se ngjarja tregon një agresivitet në rritje nga Moska dhe një rritje të gatishmërisë së Kremlinit për të testuar kufijtë e NATO-s.

Polonia dhe Ukraina e kanë cilësuar qartë hyrjen e dronëve si të qëllimshme, një qëndrim që është mbështetur edhe nga disa vende të tjera evropiane. Megjithatë, disa zyrtarë amerikanë besojnë se fluturimi i dronëve mund të ketë qenë aksidental, i shkaktuar nga ndërhyrjet elektronike ukrainase që kanë devijuar pajisjet nga kursi i tyre fillestar.

Ndërkohë, përdorimi i dronëve të pambrojtur apo “dummy” ka shtuar dilemat. Për disa, kjo mund të jetë një shenjë se Rusia thjesht donte të testonte mbrojtjen ajrore polake pa rrezikuar viktima, ndërsa për të tjerë është një taktikë tipike e Kremlinit për të shpërdoruar mbrojtjen e kundërshtarëve.

Incidenti ka vendosur NATO-n në një pozitë të vështirë, pasi duhet të vendosë mbi reagimin e duhur ndaj një veprimi të paprecedentë, pa prova të qarta mbi qëllimet e Rusisë. Ekspertët paralajmërojnë se, edhe nëse ishte gabim teknik, devijime të tilla masive janë një sinjal shqetësues për një sjellje gjithnjë e më të rrezikshme të Moskës.