Flakët që nisën nga Bashkia e Delvinës kanë përfshirë malin e Sopotit dhe tashmë janë futur në territorin e Bashkisë Gjirokastër, duke përbërë një kërcënim serioz për qytetin e Gjirokastrës dhe fshatin Lazarat. Zjarri, i fuqizuar nga era dhe thatësira, po përhapet me shpejtësi, duke vënë në alarm banorët e zonës.

Forcat zjarrfikëse të Gjirokastrës, të ndihmuara nga banorë të Lazaratit, po luftojnë për të ndaluar përhapjen e flakëve në majën e Sopotit. Situata mbetet kritike dhe çdo minutë është vendimtare, ndërsa operacioni i emergjencës vazhdon pa garanci se zjarri do të vihet nën kontroll së shpejti. Autoritetet u bëjnë apel banorëve të ndjekin udhëzimet dhe, nëse kërkohet, të evakuohen menjëherë për të shmangur rrezikun.