Presidenti ukrainas Volodymyr Zelensky mbërriti sot në Uashington për të nënshkruar një marrëveshje ekonomike të rëndësishme me SHBA-në, e cila i jep Uashingtonit akses në mineralet e rralla të Ukrainës. Marrëveshja synon të ndihmojë në financimin e rindërtimit të Ukrainës pas tre vitesh lufte.
Megjithëse dokumenti përmend rëndësinë e sigurisë së Ukrainës, ai nuk përfshin garanci të qarta ushtarake nga SHBA, duke ia lënë këtë çështje bisedimeve të mëtejshme me Trump. Mediat ukrainase kanë zbuluar se marrëveshja parashikon krijimin e një fondi të përbashkët investimesh, ku Ukraina do të ndajë 50% të të ardhurave nga burimet e saj natyrore me SHBA-në.
Ndërkohë, marrëdhëniet mes Trump dhe Zelenskyy-t kanë kaluar përmes tensioneve. Dy javë më parë, Trump e quajti Zelenskyy-n “diktator”, por së fundmi ka zbutur tonet, duke thënë se “ka respekt për të”. Gjithsesi, ai ka bërë të qartë se SHBA nuk do të japë garanci të drejtpërdrejta sigurie për Ukrainën, duke u fokusuar në mbështetjen evropiane për këtë çështje.
Trump ka refuzuar gjithashtu perspektivën e anëtarësimit të Ukrainës në NATO dhe ka lënë të hapur mundësinë e ndalimit të ndihmës ushtarake. Megjithatë, ai ka premtuar të zgjasë sanksionet ndaj Rusisë për edhe një vit tjetër.
Ky takim i parë mes dy liderëve që nga inaugurimi i Trump në janar shihet si një test kyç për të ardhmen e mbështetjes amerikane ndaj Ukrainës dhe për marrëdhëniet mes dy vendeve në një kohë kritike për luftën kundër Rusisë.
