Misteri rreth mumjeve të çuditshme me tre gishta të zbuluara në Peru është thelluar edhe më tej, pasi shkencëtarët pretendojnë se kanë zbuluar një fetus brenda barkut të një prej trupave, të njohur me emrin “Montserrat”.

Sipas ekipit të udhëhequr nga mjeku David Ruiz Vela dhe gazetari Jois Mantilla, analizat me skaner në një qendër radiologjike në Lima kanë nxjerrë në pah një fetus të vendosur me kurriz në pjesën abdominale të mumjes, me kocka ende të paformuara plotësisht. Ata pretendojnë se Montserrat ishte rreth 30 javësh shtatzënë kur vdiq, rreth 1,200 vite më parë.

CT skanimi zbulon kafkën, brinjët dhe gjymtyrët e fetusit, i cili sipas analizës, kishte një gjatësi të femurit prej 43 mm – një përmasë që përputhet me një fetus më pak se 30 javësh.

Shkencëtarët pretendojnë se fetusit iu deformuan kockat gjatë procesit të mumifikimit, ndërsa një tjetër detaj tronditës është se fytyra e tij ishte kthyer mbrapsht.

Detaj tjetër misterioz: Montserrat kishte implante metalike në kokë, kraharor dhe duar – përbërje të një aliazh me përqindje të lartë argjendi dhe metale të përdorura në teknologji hapësinore si kadmiumi dhe osmiumi. Sipas doktor Jose Zalce, disa nga këto implante janë biofunksionale dhe trupi nuk ka shfaqur shenja refuzimi ndaj tyre.

Mumjet “tridaktile” u zbuluan për herë të parë në vitin 2017 pranë vijave misterioze të Nazkës. Pavarësisht pretendimeve të studiuesve si Jaime Maussan, të cilët i paraqitën edhe në Kongresin e Meksikës si prova të mundshme të jetës jashtëtokësore, ekspertë të tjerë i kanë quajtur këto trupa “kukulla” të përbëra nga kocka kafshësh dhe ngjitëse moderne.

Por, mbështetësit e tezës për origjinën jashtëtokësore insistojnë se specimenët e analizuara nga skeptikët nuk janë të njëjtat me ato që po analizojnë aktualisht në laboratorë. Debati mbetet i ndezur: janë këto thjesht mashtrime të sofistikuara apo prova që do të tronditin shkencën dhe historinë njerëzore?