Një vrasje tronditëse ka ndodhur në periferi të Athinës më 4 korrik, ku u ekzekutua nga afër profesori i njohur i UC Berkeley, Przemyslaw Jeziorski, 43 vjeç. Ekonomisti dhe eksperti i marketingut, i cili ndodhej në Greqi për të parë fëmijët e tij dhe për të marrë pjesë në një seancë gjyqësore për kujdestarinë, u qëllua disa herë në qafë dhe gjoks nga një person i maskuar, sipas autoriteteve greke. Policia ka nisur hetimet, duke mos përjashtuar pistën e një vrasjeje me pagesë dhe ka vënë në fokus edhe anëtarë të ngushtë të familjes, ndërsa autori mbetet në arrati.

Viktima, një figurë e respektuar në fushën akademike, ishte profesor në Shkollën e Biznesit Haas në UC Berkeley dhe kishte një karrierë të shquar ndërkombëtare. Ai njihej për pasionin ndaj mësimdhënies dhe për kontributin në fushën e ekonomisë digjitale dhe marketingut sasior. Vdekja e tij ka tronditur komunitetin akademik në SHBA dhe Evropë, ndërsa familja po kërkon drejtësi dhe mbështetje për riatdhesimin e trupit në Poloni. Hetimet për këtë vrasje misterioze vazhdojnë, me autoritetet që po shqyrtojnë si pista personale, ashtu edhe ato kriminale të organizuara.