Forcat izraelite kanë vijuar bombardimet në qytetin e Gazës. Sipas Al Jazeera, 8 persona janë vrarë pas një sulmi në një shtëpi pranë Bankës së Palestinës. 

Dy fëmijë u vranë dhe dhjetra të tjerë u plagosën gjatë një sulmi tjetër në një shkollë të shndërruar në strehë në qytetin e Gazës.

Ndërkohë Sekretari i Përgjithshëm i Kombeve të Bashkuara, Antonio Guterres, tha se bota nuk duhet të “frikësohet” nga Izraeli”.

Ajo që po dëshmojmë në Gaza është e tmerrshme”, tha Guterres. Është niveli më i keq i vdekjes dhe shkatërrimit që kam parë ndonjëherë në kohën time si sekretar i përgjithshëm, ndoshta në të gjithë jetën time, dhe vuajtjet e popullit palestinez janë të papërshkrueshme: uri, mungesë e plotë e kujdesit shëndetësor efektiv, njerëz që jetojnë pa strehim të përshtatshëm në zona të mëdha përqendrimi”, tha ai.

Kritikat e Guterres vijnë përpara javës së nivelit të lartë të OKB-së, gjatë së cilës 10 vende do të njohin një shtet palestinez, pavarësisht kundërshtimeve të forta izraelite. Sipas burimeve të qëndrueshme, Izraeli ka kërcënuar të aneksojë Bregun Perëndimor nëse vendet perëndimore ecin përpara me planin e tyre të njohjes gjatë takimit të OKB-së.

Nuk duhet të frikësohemi nga rreziku i hakmarrjes. Me ose pa atë që po bëjmë, këto veprime do të vazhdojnë dhe të paktën ekziston një shans për të mobilizuar bashkësinë ndërkombëtare për të ushtruar presion mbi to që të mos ndodhin”, komentoi Sekretari i Përgjithshëm i OKB-së.

UNICEF ka raportuar se persona të armatosur vodhën ushqim terapeutik për fëmijë nga katër kamionë jashtë kompleksit të UNICEF në Qytetin e Gazës.

Ata kërcënuan shoferët me armë. Kjo grabitje ka privuar të paktën 2,700 fëmijë që vuajnë nga kequshqyerja” thekson Fondi i Kombeve të Bashkuara për Fëmijë, teksa bën thirrje për një armëpushim.