Një zjarr masiv ka përfshirë një rrokaqiell në Dubai, duke shkaktuar panik të madh dhe evakuimin urgjent të rreth 4000 banorëve nga autoritetet lokale. Ngjarja ndodhi mesditën e së premtes dhe flakët përfshinë një pjesë të madhe të ndërtesës, ndërsa përpjekjet për shuarjen e zjarrit zgjatën disa orë.
Fatmirësisht nuk raportohet për viktima apo të lënduar, ndërkohë që banorët u sistemuan përkohësisht në ambiente të sigurta. Zyrtarët lokalë njoftuan se zjarri tashmë është vënë nën kontroll dhe hetimet për zbardhjen e shkaqeve kanë nisur.
“Reagimi i shpejtë dhe profesional i ekipeve tona shpëtoi jetë dhe parandaloi një tragjedi të mundshme”, deklaroi një zëdhënës i Shërbimit të Emergjencës në Dubai. Por mes banorëve ka pasur ankesa të forta për mosfunksionimin e sistemeve të alarmit dhe kaosin gjatë evakuimit. Disa prej tyre thanë se nuk u paralajmëruan në kohë dhe se u detyruan të përdorin ashensorin për të dalë nga ndërtesa, megjithëse holli ishte mbushur me tym.
