Një turist ka shkaktuar zemërim të madh në Kinë pasi u hodh brenda zonës së mbrojtur të Ushtrisë Terrakote në qytetin e Xi’an, duke dëmtuar dy statuja të lashta dhe të paçmueshme.

30-vjeçari, i identifikuar vetëm me mbiemrin Sun, kapërceu pengesat mbrojtëse dhe rrjetat e sigurisë në muze, për të zbritur në një gropë 5.5 metra të thellë ku ndodhen statujat prej balte të ndërtuara mbi 2,000 vite më parë për të ruajtur varrin e perandorit të parë të Kinës, Qin Shi Huang.

Brenda gropës, Sun nisi të shtyjë e të tërheqë disa nga figurat, duke dëmtuar dukshëm dy prej tyre. Ai u ndalua menjëherë nga sigurimi i muzeut.

Autoritetet konfirmuan se personi vuan nga një sëmundje mendore dhe kanë nisur një hetim për ngjarjen që ka ngritur pikëpyetje serioze mbi masat e sigurisë në një nga sitet më të rëndësishme arkeologjike të botës.

Ushtria Terrakote, që mban statusin e Trashëgimisë Botërore të UNESCO-s që prej vitit 1987, përbëhet nga mbi 8,000 ushtarë, qerre dhe kuaj të ndërtuar në madhësi reale. Ato u zbuluan rastësisht më 29 mars 1974 dhe që prej asaj kohe janë bërë një nga atraksionet më të vizituara në Kinë, së bashku me Murin e Madh dhe Qytetin e Ndaluar.

Pavarësisht incidentit tronditës, muzeu mbetet i hapur për vizitorët dhe restauruesit po punojnë për të vlerësuar dëmet dhe nisur procesin e riparimit.

Ngjarja vjen pas disa akteve të tjera të vandalizmit ndaj monumenteve historike në vende të ndryshme të botës. Vetëm muajin e kaluar, një burrë në Vietnam dëmtoi fronin mbretëror të dinastisë Nguyen të ruajtur në Pallatin Thai Hoa në qytetin Hue, ndërsa në Peru një vizitor u filmua duke spërkatur një simbol seksual në një mur 600-vjeçar në qytetin prekolumbian Chan Chan.

Këto raste kanë ringjallur thirrjet për mbrojtje më të fortë të trashëgimisë kulturore dhe dënime më të ashpra për vandalët që cënojnë monumentet historike me vlerë globale.