Një grua britanike u filmua teksa tërhiqej zvarrë dhe përplasej në tokë nga forcat e sigurisë në aeroport, pasi dyshohet se sulmoi pasagjerët dhe ekuipazhin, duke detyruar një fluturim të Ryanair nga Tenerife në Prestwick të devijonte në Faro, Portugali, më 18 maj.
Pamjet dramatike tregojnë gruan duke u nxjerrë nga avioni nga disa pjesëtarë të stafit të aeroportit. Në një video të dytë, ajo shihet e prangosur në një furgon aeroporti, ndërsa përplaset në tokë nga një oficer sigurie, pas një shkëmbimi të tensionuar brenda autobusit të pasagjerëve.
“Bërtiste, kërcënonte me bombë dhe godiste njerëzit me shishe”
Dëshmitar okular Blair Morgan, një nga pasagjerët, tregoi për MailOnline se incidenti ishte i frikshëm dhe kaotik:
“Ajo filloi të bëhej agresive ndaj ekuipazhit dhe pasagjerëve. Tha se kishte vendosur bombë në avion dhe se do t’i godiste njerëzit me një shishe vere.
Ishte duke pirë, duke tymosur vape, ngrihej në sedilje, u hiqte kufjet të tjerëve dhe i kërcënonte.”
Sipas tij, shumë pasagjerë ishin të trembur dhe të stresuar, ndërsa nuk dinin si të reagonin.
Ai shton se gruaja, e cila deklaroi se ishte nga Prestwick, Skoci, nuk ishte e dehur para fluturimit, por e piu alkoolin brenda avionit.
Përplasja me forcat e sigurisë në aeroport
Pasi avioni u ul në Faro, autoritetet u ngjitën në bord dhe e arrestuan gruan, e cila u bë edhe më agresive në autobusin e aeroportit. Sipas dëshmitarëve:
“Ajo filloi të godiste, të shkelmonte dhe të pështynte rojat. Madje përplasi xhamin e derës së autobusit. Rojat u detyruan ta përplasnin në tokë.”
Ajo ndodhej në fluturim me të dashurin e saj, i cili po ashtu u nxor jashtë nga avioni, që më pas vazhdoi fluturimin drejt Prestwick.
Reagimi i Ryanair
Një zëdhënës i Ryanair konfirmoi incidentin:
“Ky fluturim nga Tenerife në Glasgow Prestwick u devijua drejt Faro-s pasi një pasagjere u bë jashtëzakonisht problematike në bord.
Ekuipazhi njoftoi policinë, e cila priti avionin në aeroportin e Faro-s dhe e largoi pasagjeren përpara se fluturimi të vazhdonte.”
“Ryanair ka një politikë zero tolerance ndaj sjelljes së pahijshme në bord dhe do të vazhdojë të ndërmarrë masa të ashpra për të siguruar një ambient të sigurt dhe të respektueshëm për të gjithë.”
