Një grabitje spektakolare dhe e dokumentuar në video ka ndodhur në Reevesland Industrial Estate, në Newport, South Wales, ku katër persona të maskuar përdorën një pajisje hidraulike ultra të fuqishme për të nxjerrë një kasafortë nga një furgon blind i kompanisë së sigurisë G4S.
Pamjet, që kanë qarkulluar në rrjet, tregojnë momentin kur banda punon me shpejtësi kundër kohës, ndërsa sirena e alarmit bie dhe punonjësit në një zyrë aty pranë filmojnë të tronditur me celularë. Grabitësit shfrytëzuan një pajisje të quajtur “hydraulic power pack”, të njëjtën që përdoret nga shërbimet zjarrfikëse për të çliruar viktima nga automjetet e aksidentuara – e njohur edhe si “çelësat e jetës” (jaws of life).
“Disa nga këta djem po vjedhin pajisje nga shërbimet zjarrfikëse. Janë perfekte për të hapur një kasafortë ose derë të blinduar banke,” tha një burim për MailOnline.
Në videon që pason, banda shihet duke hedhur tufa parash në thesë të mëdhenj, përpara se të arratisen me një makinë Audi blu.
Arrestime dhe hetime në vazhdim
Policia e Gwent ka konfirmuar se tre persona janë arrestuar:
- Dy burra nga Bristol, të moshës 34 dhe 38 vjeç, janë arrestuar për grabitje dhe lënë me kusht.
- Një i tretë, 33 vjeç, gjithashtu nga Bristol, u arrestua më vonë për grabitje dhe sulm ndaj një punonjësi të emergjencës, dhe po ashtu u lirua me kusht.
“Hetimet janë ende në vazhdim dhe kërkojmë ndihmën e qytetarëve për çdo informacion përmes Major Incident Public Portal,” – tha një zëdhënës i policisë.
G4S: Të blinduar, por të rrezikuar
Furgonët e G4S përdoren për transportimin e parave për biznese, si dyqane, kafene apo bare. Ata janë të blinduar, të pajisur me kamera sigurie, GPS, SmartWater për gjurmim, dhe mekanizma që e njollosin paratë me bojë në rast grabitjeje, duke i bërë të pavlefshme për përdorim.
Megjithatë, kjo grabitje tregon se edhe siguria e avancuar nuk mjafton për të ndalur bandat e sofistikuara, të cilat përdorin teknologji të vjedhura dhe strategji të organizuara për të kryer sulme të shpejta dhe të efektshme.
Kompania G4S ka refuzuar të komentojë, duke u justifikuar me faktin se është një çështje nën hetim aktiv.
