Një ngjarje e rëndë ka tronditur Portugali, ku një forcado i ri humbi jetën pasi u sulmua brutalisht nga një dem 700 kg gjatë një ndeshjeje në arenën e njohur Campo Pequeno në Lisbonë.
Viktima është Manuel Maria Trindade, vetëm 22 vjeç, i cili po bënte debutimin e tij si forcado, një formë tradicionale e toreadorëve portugezë që përballen me demin pa asnjë armë mbrojtëse. Pamjet tregojnë momentin dramatik kur i riu tenton të kapë brirët e demit në skenën e njohur si “pega de cara”, por kafsha e ngriti lart me forcë dhe e përplasi në murin e arenës.
Publiku i pranishëm shpërtheu në ulërima ndërsa forcat e sigurisë dhe bullfighterë të tjerë u munduan të ndalonin demin duke i tërhequr bishtin dhe duke i zënë shikimin me pelerina të kuqe. Trindade pësoi dëmtime të rënda në kokë dhe u dërgua me urgjencë në spitalin São José, ku mjekët e vendosën në koma të induktuar. Pavarësisht ndërhyrjes mjekësore, ai humbi jetën 24 orë më vonë, më 23 gusht, pas një arresti kardiak.
Humbje e dyfishtë në arenë
Ngjarja mori edhe një tjetër jetë: Vasco Morais Batista, një ortoped 73-vjeçar që po shihte shfaqjen nga lozha, u ndje keq gjatë incidentit dhe më pas ndërroi jetë në spitalin Santa Maria nga një aneurizëm aortik.
Një traditë me rrezik ekstrem
Trindade ndiqte hapat e të atit, i cili gjithashtu kishte qenë forcado me grupin São Manços, që këtë vit shënon 60-vjetorin e krijimit. Në këtë formë të veçantë të korridës portugeze, tetë forcados përballen në vijë me demin dhe, një nga një, përpiqen ta ndalojnë me trup derisa kafsha të dorëzohet.
Ndryshe nga Spanja, në Portugali demat nuk vriten në arenë për shkak të një ligji mbretëror të vitit 1836 dhe një ndalese të qartë në vitin 1921. Kafshët zakonisht çohen më pas në thertore, megjithëse disa prej tyre që tregojnë “trimëri të jashtëzakonshme” falen dhe dërgohen për riprodhim. Ende nuk dihet fati i demit që vrau Trindaden.
Kompania organizuese e korridës shprehu “dhimbjen më të thellë” për familjen e të riut dhe për grupin Grupo de Forcados Amadores de São Manços, duke e cilësuar humbjen si një tragjedi të papërshkrueshme për botën e korridës portugeze.
