Pamjet e rënda të kamerave tregojnë Coleen Campbell duke goditur një grua me çekan në një sulm brutal në rrugët e Manchesterit – një paralajmërim i dhunës edhe më të rëndë që do të vinte vetëm tre ditë më pas: tortura dhe vrasja makabre e ish-bashkëshortit të saj, trafikantit të drogës Thomas Campbell.
Coleen, 38 vjeçe, e dënuar tashmë me 13 vite burg për përfshirje në vrasjen e Thomasit, u shfaq para gjykatës përmes lidhjes video për t’u përballur me akuzat për sulmin ndaj një gruaje më 29 qershor 2022. Sulmi, i kryer bashkë me tre persona të tjerë, përfshinte goditje me çekan dhe mjete të tjera të forta, në një përleshje që zgjati rreth 90 sekonda dhe që mendohet se ishte motivuar nga xhelozia.
Por mizoria më e madhe ndodhi më 2 korrik, kur Thomas Campbell u sulmua në banesën e tij në Mossley. Ai u torturua brutalisht nga një grup i udhëhequr nga trafikanti John Belfield, me ndihmën e drejtpërdrejtë të Coleen Campbell, e cila i kishte dhënë këtij të fundit informacion mbi lëvizjet e ish-burrit të saj dhe e kishte paralajmëruar për “dhunë të nevojshme”. Thomas u gjet i zhveshur, me 61 plagë në trup dhe ujë të valuar të hedhur mbi trup, pas një sulmi që zgjati orë të tëra.
Në fillim, Coleen u përpoq të shfaqej si një “e ve” e pikëlluar, duke postuar mesazhe emocionalë në rrjete sociale dhe duke organizuar një ceremoni përkujtimore me tullumbace. Por ajo zbuloi veten në mënyrë të pazakontë – përmes një vizite te një medium, ku pretendoi se kishte komunikuar me shpirtin e Thomas, duke përshkruar në mënyrë të detajuar plagët që vetëm vrasësit mund t’i dinin. Këto deklarata alarmuan nënën e viktimës, e cila njoftoi policinë.
Hetimet zbuluan më vonë se Coleen dhe Thomas, të cilët ishin të përfshirë prej vitesh në trafik droge, ishin nën vëzhgim që nga viti 2014 për pasurinë e pajustifikuar. Në 2019, të dy u dënuan për pastrim parash, ndërsa jeta e tyre luksoze me udhëtime jashtë vendit dhe makina të shtrenjta u dokumentua gjerësisht nga policia.
Në vitin 2023, pas një gjyqi pesë-javor, Coleen u shpall fajtore për vrasje nga pakujdesia, ndërsa bashkëpunëtorët e saj – përfshirë John Belfield – u dënuan me burgim të përjetshëm.
Historia tronditëse e Coleen Campbell është shembulli i kthjellët i asaj që ndodh kur hakmarrja, xhelozia dhe krimi bashkohen në një spirale të errët që përfundon me tragjedi – një jetë e marrë mizorisht dhe një tjetër që përfundon pas hekurave.
