Ky është momenti kur një gjeneral rus u vra pasi një makinë shpërtheu në rajonin e Moskës, ngjarje që rrezikon të minojë bisedimet e ardhshme për termat e paqes me Ukrainën.
Hetuesit rusë konfirmuan vdekjen e Yaroslav Moskalik, zëvendësshefit të Drejtorisë Kryesore të Operacioneve në Shtabin e Përgjithshëm të Forcave të Armatosura Ruse.
Asnjë grup nuk ka marrë ende përgjegjësinë për atë që duket si një sulm i qëllimshëm.
Gazeta Kommersant raportoi se një person i dytë u vra gjithashtu.
Pamjet tregojnë një shpërthim të fuqishëm që shkatërroi një Volkswagen Golf rreth orës 10:40 të mëngjesit me orën lokale (07:40 GMT), dhe sipas raportimeve “gjenerali u hodh disa metra larg”.
Media ruse Baza, e cila ka burime brenda strukturave të sigurisë, raportoi se një bombë e vendosur në një makinë të parkuar në Bulvar Nesterova u aktivizua me telekomandë në momentin kur gjenerali që banonte në zonë kaloi pranë.
Shpërthimi ndodhi në të njëjtën kohë që një autokolonë e dyshuar se transportonte të dërguarin special amerikan Steve Witkoff mbërriti në Moskë për bisedime me Vladimir Putinin në një kohë të tensionuar pas një serie sulmesh ndaj Kievit që nxiti reagimin e rrallë të Trump-it të enjten: “Vladimir, NDALO!”
Ministri i Jashtëm i Rusisë, Sergey Lavrov, deklaroi më herët se Moska është “gati të arrijë një marrëveshje” me ndërmjetësimin e Shteteve të Bashkuara për t’i dhënë fund luftës në Ukrainë, duke shtuar se disa elementë të marrëveshjes së propozuar ende duhen “përpunuar”.
Kryetari i bashkisë së Kievit, Vitali Klitschko, doli nga linja zyrtare duke sugjeruar se Ukraina mund të detyrohet të heqë dorë nga një pjesë e territorit për të arritur një marrëveshje.
Kremlini duket se po përpiqet të qetësojë SHBA-të me një akt vullneti të mirë, pasi administrata Trump kërcënoi se do të tërhiqet nga roli ndërmjetësues nëse palët nuk arrijnë një marrëveshje.
“Një Volkswagen Golf shpërtheu pasi një mjet shpërthyes artizanal i mbushur me copëza metali u aktivizua,” tha zëdhënësja Svetlana Petrenko.
Shpërthimi i ngjasonte rasteve të mëparshme të atentateve ndaj personave të lidhur me ofensivën ushtarake të Rusisë në Ukrainë.
Në disa raste, Kievi ka marrë përgjegjësinë. Një burim ukrainas i tha BBC-së në dhjetor se ata kishin vrarë një tjetër gjeneral, Igor Kirillov, me një pajisje shpërthyese të fshehur në një skuter që u aktivizua në distancë pranë një blloku banimi.
Ngjarja ndodh në një moment delikat, me të dyja palët Ukraina dhe Rusia që shprehen publikisht pro një armëpushimi, megjithëse me kushte të ndryshme.
Zëvendëspresidenti i Trump-it, JD Vance, njoftoi të mërkurën se SHBA planifikon të tërhiqet nga bisedimet nëse të dyja palët nuk bien dakord për një marrëveshje paqeje.
Por një sulm i furishëm ndaj Kievit më vdekjeprurësi që nga korriku ku u vranë të paktën 12 persona, shkaktoi një reagim të rrallë nga vetë presidenti Trump në platformën e tij Truth Social:
“Jam i pakënaqur me sulmet ruse në KIEV. Të panevojshme dhe në kohën më të keqe. Vladimir, NDALO!” shkroi ai.
Sulmet e detyruan gjithashtu presidentin ukrainas Volodymyr Zelensky të kthehej urgjentisht në Kiev, duke ndërprerë pjesëmarrjen në një samit jashtë vendit me presidentin e Afrikës së Jugut, Cyril Ramaphosa.
Zelensky pritej të merrte pjesë në funeralin e Papa Françeskut të shtunën përpara sulmit.
Lavrov shtoi në fjalimin e sotëm se “ne synojmë vetëm objektiva ushtarake ose struktura civile të përdorura nga ushtria” ndërkohë që Ukraina raportoi se tre persona, përfshirë një fëmijë, u vranë në Pavlohrad, në rajonin e Dnipropetrovskut.
Ai këmbënguli gjithashtu se Rusia është e përkushtuar për të punuar drejt një armëpushimi.
Por me SHBA-në që kërcënon të tërhiqet nga roli ndërmjetësues, kryebashkiaku i Kievit, Klitschko, pranoi se Ukraina mund të duhet të heqë dorë nga disa territore për ta bërë marrëveshjen të realizueshme.
Ai i tha BBC-së se një marrëveshje e tillë do të ishte e padrejtë, por mund të ndihmonte në ndaljen e luftimeve.
Ukraina është kundër idesë amerikane që sugjeron dorëzimin e territoreve si kompromis ndaj një force agresore.
Ajo gjithashtu kërkon garanci sigurie nga partnerët ndërkombëtarë për të parandaluar që Rusia të rihapë konfliktin në të ardhmen, me Zelenskyn që thekson se Moska ka shkelur dhjetëra herë marrëveshjet për armëpushim në vitet e fundit.
Pavarësisht këmbënguljes së Kremlinit se është “gati” për një marrëveshje, sulmet ruse ndaj Ukrainës kanë vazhduar edhe gjatë natës.
Tre persona humbën jetën dhe dhjetë të tjerë u plagosën pasi një dron goditi një ndërtesë banimi në një qytet në juglindje të Ukrainës, raportuan autoritetet të premten.
Mes viktimave të sulmit gjatë natës në Pavlohrad, në rajonin Dnipropetrovsk, ishin një fëmijë dhe një grua 76-vjeçare, bëri të ditur në Telegram kreu i administratës rajonale, Serhii Lysak.
Forcat ruse lëshuan 103 dronë Shahed dhe dronë mashtrues mbi pesë rajone të Ukrainës gjatë natës, raportoi Forca Ajrore e Ukrainës.
Autoritetet në rajonet verilindore të Sumy dhe Kharkiv raportuan dëme në infrastrukturën civile, por jo viktima.
Rusia bombardoi Kievin për disa orë të enjten, duke vrarë të paktën 12 persona dhe plagosur 87 të tjerë sulmi më i përgjakshëm në kryeqytetin ukrainas që nga korriku.
