Anthony Aguilar, një ish-pjesëtar i Forcave Speciale të SHBA-së (Green Beret), ka deklaruar për BBC se ka qenë dëshmitar i drejtpërdrejtë i forcave izraelite që qëllonin me artileri dhe mortaja mbi turma civilësh të paarmatosur dhe të uritur në pikat e shpërndarjes së ndihmave në Gaza. Aguilar, i rekrutuar për të punuar me organizatën Gaza Humanitarian Foundation (GHF), akuzon si kolegët e tij amerikanë, ashtu edhe ushtarët izraelitë, për kryerje të qëllimshme të krimeve të luftës.

Sipas tij, që nga muaji maj janë vrarë mbi 1.000 palestinezë teksa kërkonin ndihma ushqimore në qendra të menaxhuara nga GHF, të mbikëqyrura nga forcat izraelite dhe kontraktorë amerikanë të sigurisë. Ndërsa Izraeli mohon se civilët janë shënjestra, disa trupa izraelitë kanë pranuar se kanë qëlluar me urdhër mbi palestinezët që prisnin ushqim, duke e përshkruar si një politikë të komanduar nga lart. Këto deklarata kanë nxitur shqetësime të mëdha ndërkombëtare për shkelje të rënda të të drejtave të njeriut dhe ligjit ndërkombëtar humanitar.