Aktorja britanike Jennifer Ellison ka ndarë publikisht momentin kur studioja e saj e kërcimit në Liverpool është grabitur nga një hajdut, i cili ka hyrë brenda në orën 05:00 të mëngjesit dhe ka vjedhur një sërë sendesh me vlerë që i përkisnin fëmijëve të saj, përfshirë biçikleta, iPad dhe laptopë. Në një postim emocional në Instagram, 42-vjeçarja publikoi pamjet nga kamerat e sigurisë dhe ofroi një shpërblim të majmë për këdo që ndihmon në identifikimin e autorit. “Më thuaj kush është ky mi i pistë dhe ku ndodhet, dhe do të të jap një shpërblim të madh në para,” shkroi ajo.
Ellison, e cila është larguar prej vitesh nga televizioni për t’u fokusuar te shkolla e saj “Jelli Studios”, falënderoi një qytetar që arriti të rikthente njërën nga biçikletat e vjedhura. Studioja e saj ka qenë trampolinë për talente të njohura si Boogie Storm nga “Britain’s Got Talent”. Ndërkohë, Ellison ka rrëfyer se ndonëse sot jeton një jetë të qetë familjare me tre fëmijët dhe bashkëshortin Rob Tickle, e kaluara e saj ka qenë e mbushur me dhunë e frikë, për shkak të lidhjes së saj të dikurshme me gangsterin Anthony Richardson. Aktorja e njohur nga seriali “Brookside” ka pranuar se ka vuajtur nga PTSD dhe se përballimi i së shkuarës në emisionin “Celebrity SAS: Who Dares Wins” e ndihmoi të gjente paqen e brendshme. Jashtë vëmendjes së ekranit, Jennifer ka ndërtuar një jetë të qetë familjare me bashkëshortin e saj Rob Tickle, me të cilin është martuar në vitin 2009, dhe së bashku rrisin tre djem – Bobby, Harry dhe Charlie. Megjithatë, jeta e saj në rini ka qenë larg nga paqja që ka sot. Ellison ka folur hapur për një marrëdhënie abuzive që pati në të kaluarën me gangsterin e njohur të Liverpool-it, Anthony Richardson, një figurë e përfshirë në botën e krimit, i cili më vonë u burgos për një sulm me shpatë. Ajo ka rrëfyer se për vite të tëra ka jetuar me frikë, është ndjekur nga grupe rivale, i është qëlluar shtëpia dhe ka përjetuar dhunë fizike e psikologjike.
Në vitin 2022, Ellison u rikthye në ekran në emisionin “Celebrity SAS: Who Dares Wins”, ku foli për herë të parë hapur për traumat që kishte përjetuar. Ajo e quajti përvojën “terapia më e mirë që kam pasur ndonjëherë”, duke pranuar se kishte nevojë të mbyllte përfundimisht kapitullin e dhunshëm të jetës së saj. “Isha një vajzë shumë e re, dhe mendoja se jeta me dhunë dhe frikë ishte normale. Sot, e di që nuk ishte. Jam me fat që kam shpëtuar dhe që jetoj ndryshe.”
Jennifer beson se ka mbetur me PTSD nga ajo periudhë e errët, por sot është mirënjohëse për jetën e re që ka ndërtuar. Krahas mësimdhënies dhe përkujdesjes për fëmijët, ajo vijon të jetë aktive në komunitet, duke ndarë përvojat e saj për të frymëzuar të tjerët që mund të përballen me histori të ngjashme. Ndërkohë, policia e Liverpool-it po punon për identifikimin e autorit të grabitjes së fundit dhe Jennifer vazhdon të kërkojë ndihmën e publikut për ta sjellë para drejtësisë.
