Lionel Messi dhe Cristiano Ronaldo, dy ikonat më të mëdha të futbollit modern, përjetuan të njëjtin fat sportiv në të njëjtën ditë: eliminim nga garat ndërkombëtare me skuadrat e tyre përkatëse, Inter Miami dhe Al Nassr.
Inter Miami dështon në Champions Cup
Skuadra amerikane e Inter Miamit, me Messin titullar për 90 minuta, u mund 1-3 nga Vancouver Whitecaps në gjysmëfinalen e CONCACAF Champions Cup. Jordi Alba kaloi i pari në avantazh skuadrën nga Florida, por White, Vite dhe Berhalter përmbysën gjithçka për kanadezët. Pavarësisht se Messi u vlerësua lojtari më i mirë i skuadrës së tij, ai nuk arriti të shmangte eliminimin.
Al Nassr del jashtë Champions-it të Azisë
Në Arabinë Saudite, Al Nassr i Cristiano Ronaldos u përball me një tjetër surprizë. Skuadra saudite u mund 2-3 në Riad nga Kawasaki Frontale e Japonisë dhe u eliminua në gjysmëfinalen e AFC Champions League. Edhe pse Ronaldo qëndroi në fushë gjatë gjithë ndeshjes, ai nuk arriti të gjente rrjetën.
Një ditë e errët për dy legjendat, që tregoi se edhe ikonat globale nuk janë të paprekshme përballë ligjeve të futbollit.
