Pamjet filmike tronditëse tregojnë momentin kur Lenny Scott, 33 vjeç, baba i trefishtë, u qëllua për vdekje me gjashtë plumba jashtë një palestre në Skelmersdale, Britani, më 8 shkurt të vitit të kaluar. Vrasësi, i veshur me jelek fosforeshent, u afrua me qetësi dhe hapi zjarr ndaj viktimës në një akt të mirëorganizuar hakmarrjeje.
Sipas prokurorisë britanike, motivi i vrasjes lidhej me ngjarje të ndodhura katër vite më parë në burgun Altcourse në Liverpool, ku Scott punonte si oficer. Ai kishte kapur një të burgosur, Elias Morgan, me një telefon të paligjshëm në qeli. Ajo pajisje përmbante prova të një marrëdhënieje të fshehtë dhe të ndaluar seksuale mes Morgan dhe një oficereje burgu, Sarah Williams.
Pasi Scott refuzoi t’i “shkruante gabim dokumentet” dhe nuk pranoi ryshfet prej 1,500 paundësh, Morgan e kërcënoi me fjalët: “Do të pres kohën, por do të të marr”.
Prokurori Alex Leach KC tha në gjyq se Morgan “e kishte orkestruar vrasjen dhe vetë kishte tërhequr këmbëzën”. Pamjet e CCTV tregojnë se Scott doli nga palestra rreth orës 17:30 dhe po fliste pranë një makine, kur autori i maskuar me jelek pune i afrohet dhe e qëllon pa mëshirë.
Scott kishte njoftuar më herët autoritetet për kërcënimet, duke thënë se kishte frikë për jetën e familjes. Ai ishte tmerruar nga deklaratat e Morgan se “do t’i digjte shtëpinë me familjen brenda”.
Elias Morgan është tani 35 vjeç dhe po përballet me akuzën për vrasje, së bashku me Anthony Cleary, 29 vjeç, i cili akuzohet për ndihmë në krim përmes transportimit të motorit elektrik të përdorur nga vrasësi. Të dy mohojnë akuzat. Gjykimi vazhdon.
