Conor McGregor ka shkaktuar sërish polemika pas një incidenti të dhunshëm në klubin legjendar Pacha në Ibiza, ku ai u filmua duke goditur brutalisht një festues me dy grushte në mëngjesin e së martës.

Ish-kampioni i UFC-së, 36 vjeç, shihet në video duke biseduar me një burrë në pistën e vallëzimit përpara se të vendosë krahun mbi supet e tij dhe më pas e qëllon me dorën e majtë, ndërsa në tjetrën mban një gotë alkooli. Vetëm pak sekonda më vonë, ai godet sërish, duke e lënë viktimën të shtrirë në tokë.

Pavarësisht sulmit, McGregor nuk u përjashtua nga klubi. Sipas dëshmitarëve, “njeriu i goditur u largua nga vendi, ndërsa Conor vazhdoi të festonte si të mos kishte ndodhur asgjë.”

Incidenti ndodhi vetëm pak orë pasi McGregor u pa duke festuar në klubin “O Beach” me Katie Price, e cila ndau një foto me të në rrjetet sociale me përshkrimin: “You legend.”

Ky nuk është rasti i parë që McGregor përfshihet në incidente të ngjashme në Ibiza. Në vitin 2021, ai goditi një adoleshent që i kërkoi autograf, ndërsa në 2019 sulmoi me grusht një burrë të moshuar në një bar në Dublin për shkak se ky i fundit refuzoi një gotë të uiskit të tij.

Ndërkohë që ai nuk është rikthyer në kafaz që prej vitit 2021, McGregor ka qenë aktiv në biznes dhe në media. Së fundmi është përfolur për blerjen e platformës OnlyFans, në një marrëveshje të mundshme prej 6 miliardë paundësh me investitorë nga Los Angeles.

Pavarësisht rikthimeve të tij të mundshme në politikë apo biznes, sjellja e McGregor jashtë arenës sportive vazhdon të shkaktojë debat për të ardhmen e tij si figurë publike.