Pamjet filmike të sigurisë kanë zbuluar momentin kur aktorja britanike e serialit “Bridgerton”, Genevieve Chenneour, 27 vjeç, u përball heroikisht me një grabitës algjerian në një kafene në Kensington, Londër. Ngjarja ndodhi më 8 shkurt në ambientet e “Joe & The Juice”, kur Zacariah Boulares, 18 vjeç, i njohur për një seri krimesh të mëparshme, i rrëmbeu telefonin nga tavolina teksa ajo ishte ulur me një mike. Aktorja reagoi menjëherë, duke ndaluar grabitësin me ndihmën e shoqes së saj dhe duke e goditur për ta detyruar të dorëzonte telefonin. Incidenti ndodhi në sy të klientëve të shokuar dhe përfundoi pas disa minutash përleshjeje, ku Boulares u detyrua të largohej pa pajisjen e vjedhur.
Boulares, që ishte liruar para kohe nga qendra e të miturve pas një sulmi të dhunshëm me hanxhar ndaj këngëtarit të njohur Aled Jones, ka një dosje kriminale me 12 dënime dhe 28 vepra penale. Më 29 maj ai pranoi fajësinë për vjedhjen e telefonit të aktores dhe për sulmin ndaj një klienti tjetër, Carlo Kurcishi. Ai gjithashtu pranoi se kishte vjedhur një çantë lëkure në një restorant picash në Londrën Qendrore më 30 janar. Sipas gjykatësve, sjellja e tij ishte “e tmerrshme”. Aktorja britanike, e cila ka qenë më parë notare artistike për ekipin olimpik të Britanisë, deklaroi se ka pësuar një tronditje në kokë dhe që atëherë ndjehet e pasigurt. Edhe qeni i saj, sipas saj, është traumatizuar. Boulares është aktualisht në paraburgim dhe pritet të dënohet më 17 qershor në Gjykatën e Kurorës në Isleworth.
Policia Metropolitane e Londrës njoftoi se grabitësi, i cili ishte identifikuar nga kamerat e sigurisë, goditi fizikisht edhe një qytetar tjetër që tentoi ta ndalonte. Viktima u qëllua me grushte dhe shqelma përpara se Boulares të largohej nga vendngjarja. Në Londër, gjatë vitit 2024, janë vjedhur mbi 70,000 telefona nga një total prej rreth 100,000 grabitjesh në të gjithë Mbretërinë e Bashkuar – duke e bërë këtë një fenomen të përhapur dhe alarmues. Sipas burimeve pranë aktores, Genevieve tregoi guxim të jashtëzakonshëm gjatë ngjarjes: “Ishte një incident tronditës, por ajo e përballoi në mënyrë të admirueshme,” thanë ata.
