Kanë kaluar 27 vite nga zhdukja misterioze e Amy Bradley nga një anije turistike në Karaibe, por familja e saj ende nuk ka marrë përgjigje. Rasti, i cili ka tronditur opinionin publik, është rikthyer në qendër të vëmendjes përmes dokumentarit të ri në Netflix, Amy Bradley Is Missing, i publikuar më 16 korrik 2025.

Amy, atëherë një e diplomuar e re në kolegj, udhëtonte me prindërit dhe vëllain e saj Brad në një kroçerë shtatëditore që nisej nga San Huani i Porto Rikos, më 21 mars 1998. Dy ditë më vonë, pasi kishte kaluar mbrëmjen në klubin e anijes me vëllain, ajo u pa për herë të fundit duke pushuar në ballkonin e kabinës së saj. Të nesërmen në mëngjes, kur i ati shkoi ta kontrollonte, Amy nuk ishte më aty – duke lënë pas vetëm një bluzë polo dhe sandalet.

Në një intervistë të dhënë për emisionin britanik This Morning, Brad Bradley tha se familja është e bindur që Amy nuk ra dhe as nuk u hodh nga anija, pasi kishte frikë nga lartësia. Ai zbuloi se pas transmetimit të dokumentarit, kanë marrë mijëra mesazhe, këshilla dhe të dhëna të mundshme.

“Ne besojmë se Amy u shënjestrua, u mor nga anija dhe u trafikua në një situatë shfrytëzimi seksual,” – tha Brad. – “Na duhet një person që di diçka të dalë përpara. Jam i bindur se janë më shumë se një që e dinë, por na duhet ai telefonim që do ta zbardhë të vërtetën.”

Megjithatë, familja nuk ka gjetur paqe. Përveç shpresës për informacione të reja, ata janë përballur me sulme dhe komente të ashpra nga ndjekës të Netflix. Brad pranoi se dokumentari ka qenë veçanërisht i vështirë për nënën e tyre, ndërsa i ati e ka marrë po ashtu rëndë emocionalisht.

Hetimet zyrtare për zhdukjen e Amy Bradley nuk kanë sjellë ende prova përfundimtare, ndërsa rasti mbetet një nga misteret më të famshme të zhdukjes në det të hapur.