Zgjedhjet e 11 majit nuk ndryshuan vetëm hartën parlamentare, por sollën një zinxhir largimesh nga pushteti vendor, pasi disa prej drejtuesve lokalë fituan mandate si deputetë dhe lanë postet e tyre.
Nga Tirana në Berat, një sërë figurash të njohura – kryetarë bashkie, nënkryetarë, juristë e anëtarë të këshillave – janë larguar për t’u bërë pjesë e Kuvendit të ri. Në Tiranë u larguan Romina Kuko (PS), kryetare e Këshillit Bashkiak, dhe Tedi Blushi (opozita). Në Durrës, Ani Dyrmishi (PS) dhe Manjola Luku (PD) lanë gjithashtu detyrat për të vijuar në nivelin kombëtar.
Fier, Lushnje dhe Dibra përballen tani me vakanca në pozicione të rëndësishme si nënkryetarë e këshilltarë. Ndërkohë, kryebashkiakët Ervin Demo (Berat), Agron Malaj (Mat) dhe Termet Peçi (Tepelenë) i dorëzuan zyrat për të marrë vendin në Kuvend.
Ky mobilitet politik kërkon emërime të reja në nivel vendor, të cilat pritet të zyrtarizohen në javët në vijim përmes vendimeve të Këshillave Bashkiakë apo propozimeve nga forcat politike përkatëse.
