Sa herë e keni dëgjuar shprehjen “mëngjesi është vakti më i rëndësishëm i ditës”? Dhe sa herë e keni injoruar, me justifikimin klasik “jam vonë për punë” ose “dua të humbas peshë”? Në realitet, çdo vakt i anashkaluar është një gur i vogël në murin e sëmundjeve të mëdha që mund të ndërtojmë me duart tona.
Ekspertët paralajmërojnë se shmangia e vakteve nuk është thjesht një zakon i keq – është një praktikë e rrezikshme që çon drejt çrregullimeve metabolike, çrregullimeve hormonale dhe në raste afatgjata, drejt diabetit të tipit 2.
Çfarë ndodh me trupin kur “harrojmë” të hamë?
Kur nuk i jepni trupit kaloritë që i nevojiten në kohën e duhur:
- Nivelet e sheqerit në gjak bien në mënyrë drastike.
- Insulina reagon me vonesë, duke rritur rrezikun për diabet.
- Metabolizmi ngadalësohet, duke çuar në shtim të peshës – dhe jo humbje.
- Trupi akumulon dhjam si mekanizëm mbrojtës, duke e bërë më të vështirë djegien e tij.
Pasojat që nuk duken menjëherë
Nuk është vetëm shëndeti fizik që vuan. Mungesa e ushqyerjes së rregullt ndikon fuqishëm në gjendjen shpirtërore:
- Irritim, humbje motivimi, nervozizëm.
- Rritje të nivelit të kortizolit (hormoni i stresit).
- Oreks i pakontrolluar në darkë që çon në konsum të tepruar ushqimi.
Sipas të dhënave të AgroWeb.org, 23% e njerëzve pranojnë se anashkalojnë vakte rregullisht, kryesisht mëngjesin. Shumica besojnë gabimisht se kjo i ndihmon për të humbur peshë – ndërkohë që shkenca tregon të kundërtën.
Në vend që të bini në peshë, shtoni sëmundje.
Në një shoqëri që glorifikon produktivitetin dhe trupin “fit”, shmangia e vakteve është kthyer në një normë të rrezikshme. Por trupi nuk është makinë – dhe kur nuk e furnizon me karburantin e duhur në kohën e duhur, nuk punon më, por prishet.
