Ishte shtator i vitit të kaluar kur 24-vjeçarja Kelly (emër i ndryshuar për arsye sigurie) udhëtonte me një fluturim të Qatar Airways nga Doha drejt aeroportit Gatwick në Londër, pas një udhëtimi në Afrikë. E lodhur, me kufje në vesh dhe e mbuluar me një batanije, ajo u zhyt shpejt në gjumë në fluturimin e natës.
Por, dy orë para uljes, ajo u zgjua nga burri që ishte ulur pranë saj – i cili po e sulm*onte seksualisht. Burri në të 60-at është tashmë i dënuar dhe po vuan një dënim me burg, por Kelly thotë se trauma ka lënë pasoja të thella në jetën e saj dhe se tani po lufton për të marrë dëmshpërblim nga shteti.
Si ndodhi sulmi?
Duke folur për herë të parë për BBC-në, Kelly rrëfen se burri kishte tërhequr një batanije të dytë mbi të dy përpara se të kryente sulmin.
“Duart i kishte futur në pantallonat e mia. I thashë: ‘Çfarë po bën?’, i thashë ‘Ndalo’. Ai u përgjigj: ‘Jo, të lutem’. M’u desh ta shtyja me forcë dorën jashtë dhe menjëherë u ngrita. Lashë telefonin, çantën, pasaportën, madje dhe këpucët. Vrapova drejt tualetit, e lashë derën hapur dhe i tregova stjuardesës.”
Fillimisht, Kelly u vendos në një vend të kabinës së ekuipazhit dhe më pas u zhvendos në një vend tjetër në avion deri në uljen në Gatwick.
“E pata të vështirë të përballoja pjesën e mbetur të fluturimit,” kujton ajo. “Kisha shumë ankth… çdo njeri që kalonte pranë më trembte, sepse mendoja se ishte ai.”
Agresori u arrestua menjëherë pas uljes
66-vjeçari Momade Jussab u arrestua menjëherë pas uljes së avionit në Gatwick. Ai u akuzua për një rast sulmi seksual me depërtim dhe dy raste të tjera të sulmit seksual. Në mars u shpall fajtor dhe aktualisht po vuan një dënim prej gjashtë vjet e gjysmë burg.
Një betejë për dëmshpërblim që po dështon për shkak të një “boshllëku ligjor”
Kelly ka kërkuar kompensim nga Skema për Dëmshpërblim nga Krimet Penale (CICS), e cila kompenson viktimat e krimeve të dhunshme fizike apo seksuale. Por aplikimi i saj u refuzua nga Autoriteti për Dëmshpërblimin nga Krimet Penale (CICA), me arsyetimin se krimi nuk ndodhi në një “vend të përshtatshëm” sipas përkufizimit ligjor, pasi avioni ishte i regjistruar në Katar, jo në Mbretërinë e Bashkuar.
Ajo apeloi vendimin, por edhe herën e dytë iu refuzua në maj. Sipas ligjit aktual, vetëm incidentet në avionë të regjistruar në Britani mund të përfitojnë kompensim nga kjo skemë. Kelly dhe avokatët e saj nga firma Leigh Day e konsiderojnë këtë vendim të padrejtë dhe “irracional”.
Kërkesa për ndryshim ligji
Firma e saj ligjore i ka kërkuar Ministres së Drejtësisë, Shabana Mahmood, të mbyllë këtë boshllëk ligjor.
“Skema aktuale lejon që një sulm seksual i dhunshëm në një avion britanik të kompensohet, por në një avion të huaj që mbërrin në Britani, viktima përjashtohet – edhe nëse agresori ndiqet penalisht në MB,” deklaroi Claire Powell nga Leigh Day.
Reagimi i Ministrisë së Drejtësisë
Një zëdhënës i Ministrisë së Drejtësisë deklaroi:
“Mendimet tona janë me viktimën dhe mbetemi të palëkundur në misionin tonë për të përgjysmuar dhunën ndaj grave dhe vajzave brenda një dekade. Rregullat që ndjek CICA dhe vlerat e dëmshpërblimeve përcaktohen nga Parlamenti. Ekzistojnë edhe rrugë të tjera për të mbështetur viktimat.”
“Çfarë ndodh me mua?”
Kelly thotë se edhe pse agresori është dënuar, ajo vazhdon të vuajë pasojat psikologjike dhe nuk ka mundësi të përballojë trajtimin që i nevojitet.
“Unë e kuptoj që ai është dënuar dhe po paguan për atë që bëri. Por po unë? Unë nuk mund të përballoj terapinë që më nevojitet. Dua ndihmë profesionale dhe dua të dëgjohem,” thotë ajo.
Ajo e ka bërë publike historinë e saj për të rritur ndërgjegjësimin te gratë dhe vajzat që udhëtojnë vetëm:
“Ju lutem, jini të vëmendshme. Mos kini frikë, por jini të kujdesshme. Kjo mund t’i ndodhë kujtdo.”
