Gjykata e Posaçme ka ndryshuar masën e sigurisë nga arrest në burg në arrest shtëpie për Xhuljo Vuksanin, personin e vetëm që mbahej i arrestuar për masakrën e Dobraçit, nën dyshimin se ai siguroi automjetin tip Range Rover që u përdor nga autorët.

Vendimi u dha nga gjyqtari i Posaçëm, Erjon Cela, i cili pranoi kërkesën e SPAK për ndryshimin e masës së sigurisë ndaj tij.

Vuksani u arrestua në nëntorin e vitit të kaluar me urdhër të prokurores Elida Kackini, si person i përfshirë në masakrën e Dobraçit, ku u ekzekutuan Arlind Bushati dhe Hamza Lici, si dhe humbën jetën bashkëshortët Bashkim dhe Flutura Basha.

Ngjarja e rëndë ndodhi më 30 tetor të vitit 2024 në zonën e Dobraçit, ku persona të paidentifikuar qëlluan nga një automjet drejt makinës ku udhëtonin dy të rinjtë, Hamza Lici dhe Arlind Bushati.

Nga breshëria e plumbave, automjeti ku udhëtonin dy viktimat humbi kontrollin, për pasojë u përplas me një motor ku udhëtonin Flutura dhe Bashkim Basha, të cilët nuk kishin lidhje me ngjarjen.

Në automjetin e viktimave, dyshohet se ndodhej një person i tretë, i ulur në sediljen e pasme, por prokuroria nuk ka bërë ende një deklaratë zyrtare në lidhje me këtë dyshim.

Pasi prokuroria e Shkodrës nisi hetimet për këtë çështje, pak ditë më pas shpalli moskompetencë duke ia referuar dosjen Prokurorisë së Posaçme Antikorrupsion për grup të strukturuar kriminal, vepër penale që është kompetencë e SPAK.

Për ngjarjen e Dobraçit janë kryer disa veprime nga prokurorja Elida Kaçkini, ndërkohë që çështja është ende nën hetim.