Pamje satelitore të publikuara së fundmi kanë nxjerrë në pah përpjekjet dëshpëruese të regjimit të Koresë së Veriut për të fshehur një incident të turpshëm ushtarak: fundosjen e një anijeje luftarake të re, përpara syve të liderit suprem Kim Jong Un, gjatë një ceremonie zyrtare lëshimi në qytetin portual Chongjin.
Anija shkatërruese me peshë 5,000 tonë, e projektuar për të mbajtur armë të sofistikuara përfshirë raketa bërthamore balistike dhe lundruese, u përmbys dhe u dëmtua rëndë për shkak të një defekti teknik gjatë vendosjes në ujë. Pamjet e kapura nga kompania Planet Labs PBC tregojnë se mjeti lundrues ndodhet ende i pjesshëm i fundosur në anë të portit, i mbuluar me mushama të mëdha blu – në një përpjekje të dukshme për të fshehur dështimin.
Sipas agjencisë shtetërore KCNA, Kim Jong Un e cilësoi incidentin si “një akt kriminal i shkaktuar nga neglizhenca absolute dhe empirizmi jo shkencor”. Lideri ka urdhëruar që riparimi i plotë i anijes të përfundojë “pa kushte” përpara sesionit plenar të Partisë në qershor, duke e konsideruar jo vetëm një çështje teknike por një sfidë politike që prek “autoritetin e shtetit”.
Autoritetet koreanojugore, përmes zëdhënësit të Shtabit të Përgjithshëm Lee Sung Joon, konfirmuan se mjeti ka pësuar dëmtime serioze dhe besohet se ishte i pajisur me të njëjtat sisteme armësh si anija “Choi Hyun-ho”, e cila u prezantua vetëm muajin e kaluar në portin e Nampo.
KCNA tha se fundosja erdhi si rezultat i një defekti në lëshuesin e pasmë, që shkëputi anijen në mënyrë të pabarabartë dhe çoi në shkatërrimin e ekuilibrit të saj. Analistë ushtarakë nga Koreja e Jugut e cilësojnë këtë si një incident të rrallë që zbulon mungesën e përvojës dhe nxitimin e Koresë së Veriut për të prodhuar anije të mëdha, në kuadër të ambicies së Kim për të rritur fuqinë detare përballë “kërcënimeve të udhëhequra nga SHBA”.
Sipas Moon Keun-sik, ekspert detar nga Universiteti Hanyang në Seul, “publikimi i incidentit, ndonëse i turpshëm, është një përpjekje për të treguar vendosmërinë e regjimit në modernizimin e flotës detare”.
Incidenti ndodhi vetëm një muaj pas Kim Jong Un dhe vajza e tij, Kim Ju Ae – e cila konsiderohet si trashëgimtare e mundshme – prezantuan një tjetër anije të ngjashme të pajisur me kapacitete bërthamore, si pjesë e strategjisë për zgjerimin e goditjeve parandaluese dhe përforcimin e mbrojtjes ndaj aleancës ushtarake SHBA-Kore e Jugut.
Për momentin, nuk dihet nëse ka pasur të lënduar gjatë incidentit, ndërsa pala jugkoreane nuk ka bërë ende një koment të zyrtar mbi situatën.
