Mijëra banorë të Palma de Mallorca, Ibizës dhe qyteteve të tjera spanjolle dolën në rrugë të dielën pasdite për të protestuar kundër turizmit masiv, duke u drejtuar me thirrje të forta turistëve britanikë: “Shkoni në shtëpi!”. Turistët e ulur në restorante u panë të habitur dhe të stepur, teksa protestuesit marshonin me tambure, pankarta dhe slogane të fuqishme përballë syve të tyre.
Protesta nisi në Plaza de España në zemër të Mallorcas, me mbi 30,000 pjesëmarrës sipas organizatorëve, që mbanin pankarta me mbishkrime si “Mallorca nuk është lopë për të mjelë”, “Turistët jashtë”, “Pushimet tuaja, ankthi ynë” dhe “Mjaft më”. Disa nga të rinjtë marshues u panë me pistoleta uji, duke planifikuar të spërkasnin turistët gjatë kalimit, ndërsa të tjerë brohorisnin kundër Airbnb dhe “guiris” – term që përdoret për të përshkruar të huajt, sidomos britanikët.
Në qendër të kritikave janë çmimet e rritura të qirave, mungesa e strehimit për vendasit dhe ndikimi në mjedis. “Nuk dua që 80% e të ardhurave të mia të shkojnë për qira”, tha Oriol, 40 vjeç, banor lokal. “Nuk dua të detyrohem të flas vetëm anglisht ose gjermanisht në pallatin tim.” Alex, 32 vjeç, i punësuar me pagë të mirë, thekson se nuk përballon dot të blejë një shtëpi dhe është ende i detyruar të jetojë me prindërit. “Ishulli nuk po përballon më këtë fluks”, shtoi ai.
Protesta të ngjashme u mbajtën edhe në Ibiza, ku rreth 1,000 protestues marshuan nga Portal de Ses Taules deri te Plaza de sa Graduada, nën masa të shtuara sigurie. Lëvizja u organizua nga platforma Canviem el Rumb, e cila kërkon ulje të menjëhershme të nivelit të turizmit, ndalimin e ndërtimeve të hoteleve të reja dhe ndalimin e shtëpive me qira turistike të tipit Airbnb.
Sipas aktivistëve, turizmi masiv ka bërë që fshatra të tëra në Ibiza të përballen me mungesë uji, punëtorët sezonalë të trajtohen në mënyrë çnjerëzore, dhe qindra familje të jetojnë në kushte të papërshtatshme. “Njerëzit punojnë për të mbijetuar, jo për të jetuar me dinjitet”, deklaroi Agnès Vidal nga organizata.
Ndërkohë, bizneset dhe ekspertët e turizmit paralajmërojnë pasojat. Një sondazh nga Majorca Daily Bulletin zbulon se 44% e pushuesve janë duke rishikuar vendimin për të vizituar ishullin pas protestave. Paul Charles, CEO i agjencisë The PC Agency, paralajmëroi se “turizmi është themeli i ekonomisë së ishujve dhe humbja e vizitorëve mund të jetë katastrofike”.
Në mes të kësaj përplasjeje mes banorëve të zemëruar dhe pushuesve të habitur, qëndrimi i qartë i aktivistëve është se: modeli aktual i turizmit është i paqëndrueshëm dhe po i çon ishujt drejt një kolapsi social dhe mjedisor. Ata kërkojnë kufizime, taksa më të larta për turistët dhe rregullim të tregut të banesave – përpara se të jetë shumë vonë.
