Presidenti i SHBA-së, Donald Trump, deklaroi të premten se ka urdhëruar zhvendosjen e dy nëndetëseve bërthamore amerikane në “zona të përshtatshme”, si reagim ndaj deklaratave të ashpra të Dmitry Medvedev, ish-president i Rusisë dhe aktualisht zëvendëskryetar i Këshillit të Sigurisë ruse.

Në një postim në rrjetin Truth Social, Trump tha se veprimi ishte një masë paraprake për të qenë të “përgatitur”, në rast se kërcënimet nuk ishin vetëm fjalë. Nuk është bërë e ditur lloji apo destinacioni i nëndetëseve, pasi lëvizjet e flotës nënujore të SHBA-ve mbahen zakonisht konfidenciale.

Llojet e nëndetëseve amerikane:

• Ballistike (SSBN) – Mbajnë raketa Trident me mbushje bërthamore dhe shërbejnë si element kryesor i parandalimit strategjik.
• Me raketa udhëzuese (SSGN) – Ishin SSBN të konvertuara për të mbajtur raketa Tomahawk dhe për të dërguar trupa specialë.
• Sulmuese të shpejta – Përfshijnë klasat Virginia, Los Angeles dhe Seawolf, të pajisura me torpedo dhe raketa për sulme detare apo tokësore.

Për momentin, nuk ka njoftime për tensione të mëtejshme, por veprimi i Trump ka shkaktuar reagime të menjëhershme për rrezikun e përshkallëzimit bërthamor.