Presidenti amerikan Donald Trump u prit me ceremoni mbretërore në Riad, në ndalesën e parë të vizitës së tij të parë jashtë vendit në mandatin e dytë presidencial. Princi i Kurorës, Mohammed bin Salman, i dhuroi një pritje që përfshinte eskortë me kuaj për makinën presidenciale “The Beast”, tapet të purpurt dhe një nderim me avionë luftarakë F-15 që shoqëruan Air Force One në ulje. Trump, i shoqëruar nga figura të njohura si Elon Musk, Marco Rubio dhe Sam Altman, po synon të sigurojë deri në 1 trilion dollarë investime nga Arabia Saudite për ekonominë amerikane.
Trump dhe MBS zhvilluan takime në pallatin mbretëror, ndërsa gjatë forumit ekonomik në Riad, u bashkuan edhe CEO të kompanive gjigante si Google, Amazon, Boeing, dhe BlackRock. Arabia Saudite ka premtuar investime fillestare prej 600 miliardë dollarësh në SHBA gjatë katër viteve të ardhshme, përfshirë blerjen e avionëve F-35 dhe sistemeve të avancuara të mbrojtjes. Ndërkohë, presidenti Trump po përpiqet të rikthejë Arabinë Saudite në marrëveshjet Abrahamike, me një kusht të vendosur nga Riadi: fundi i luftës në Gaza dhe një rrugë drejt shtetësisë për palestinezët.
Në qendër të vëmendjes është edhe një tjetër çështje e debatueshme: presidenti pritet të pranojë një avion luksoz prej 400 milionë dollarësh nga familja mbretërore e Katarit, për ta përdorur si Air Force One për shkak të vonesave të Boeing. “Vetëm një njeri budalla do refuzonte një dhuratë kaq të shtrenjtë”, u shpreh Trump, ndërsa përgatitet të vizitojë edhe Emiratet e Bashkuara Arabe në vijim të turneut të tij në Lindjen e Mesme.
