Presidenti amerikan Donald Trump ka nxitur sërish shqetësime për gjendjen e tij shëndetësore, pasi fotot e publikuara gjatë Samitit G7 në Kananaskis, Kanada, tregojnë duart e tij me ngjyrosje të pazakontë, enjtje dhe shenja që duken si të mbuluara me make-up.

Në moshën 79-vjeçare dhe përballë një krize të rritur mes Izraelit dhe Iranit, Trump u largua herët nga samiti, gjë që përforcoi dyshimet se lëvizja mund të ketë qenë e motivuar nga arsye shëndetësore.

Në internet, shumë përdorues u shprehën të habitur nga gjendja e dorës së djathtë të presidentit. Disa spekuluan për edemë (grumbullim lëngjesh), të tjerë sugjeruan gjurmë nga një procedurë me serum ose mungesë vitaminash.

Mjekët: mund të jetë efekt moshe, barnash ose goditje e vogël

Sipas Dr. Jeff Foster, mavijosja e përsëritur mund të jetë rezultat i një kanule të vendosur për serum. Ai theksoi se lëkura e njerëzve të moshuar është më e hollë dhe më e ndjeshme ndaj dëmtimeve.

Ndërkohë, Dr. Ross Perry shtoi se në moshën 78–79 vjeç, është normale që lëkura të humbasë fleksibilitetin dhe të bëhet më e brishtë, sidomos nëse ekspozohet shpesh në diell ose nëse pacienti merr barna si antikoagulantë apo kortikosteroide.

White House më herët ka pretenduar se mavijosjet vijnë nga shtrëngimet e shumta të duarve gjatë fushatës, por ekspertët shprehen skeptikë ndaj këtij shpjegimi.

Fundja, incident rastësor apo sinjal paralajmërues?

Spekulimet mbi shëndetin e Trump kanë nisur prej kohësh, por imazhet e fundit i kanë rritur shqetësimet. Ndërsa ai përgatitet për përballje të mëtejshme politike dhe ndërkombëtare, shumëkush pyet: a është presidenti fizikisht në gjendje për të përballuar presionin e mandatit të tij të dytë?

Nëse duart e mavijosura janë thjesht efekt i moshës apo shenjë e një problemi më serioz, mbetet për t’u parë. Por një gjë është e sigurt: çdo detaj për Donald Trump vazhdon të ndezë debat – dhe tani, edhe një dorë është bërë lajm.